قازاقستاندا كەيبىر سوتتالعاندارعا مەكەمە اۋماعىنان تىس جەردە سمارتفون پايدالانۋعا رۇقسات بەرۋ ۇسىنىلدى. ىشكى ىستەر مينيسترلىگى ءتيىستى بۇيرىق جوباسىن "اشىق نقا" پورتالىندا جاريالاپ، ونى قوعامدىق تالقىلاۋعا شىعاردى، دەپ حابارلايدى Dalanews.kz.
ۇسىنىلىپ وتىرعان وزگەرىستەر تەك قاۋىپسىزدىگى ەڭ تومەن كولونيالار قاتىستى قابىلدانۋى مۇمكىن. جوباعا سايكەس، سوتتالعاندارعا مەكەمەدەن تىس ۋاقىتتا سمارتفون قولدانۋعا مۇمكىندىك بەرۋ كوزدەلىپ وتىر. سونىمەن قاتار ءۇشىنشى وڭ مىنەز-قۇلىق دارەجەسى بار سوتتالعاندار ءۇشىن "تىنىش ساعات" ەنگىزۋ ۇسىنىلادى. بۇدان بولەك، كەزدەسۋگە جازىلۋ جانە قالاعا شىعۋعا رۇقسات الۋ قىزمەتىن ارنايى تەرمينالدار ارقىلى راسىمدەۋ تەتىگى قاراستىرىلعان. مينيسترلىك بۇل باستامالار سىبايلاس جەمقورلىق تاۋەكەلدەرىن ازايتىپ، پروسەستەردىڭ اشىقتىعىن ارتتىرۋعا ىقپال ەتەدى دەپ ەسەپتەيدى.
بۇيرىق جوباسى 11 ناۋرىزعا دەيىن قوعامدىق تالقىلاۋدا بولادى. وسى مەرزىم ىشىندە ازاماتتار ءوز ۇسىنىس-پىكىرلەرىن بىلدىرە الادى.
ايتا كەتەيىك، قاۋىپسىزدىگى ەڭ تومەن مەكەمەلەردە نەگىزىنەن ابايسىزدا قىلمىس جاساعاندار جانە العاش رەت جەڭىل نە ورتاشا اۋىرلىقتاعى قۇقىق بۇزۋشىلىق ءۇشىن سوتتالعاندار جازاسىن وتەيدى. مۇنداي كولونيا-پوسەلەنيەلەردە وقشاۋلاۋ دەڭگەيى تومەن: سوتتالعاندارعا ازاماتتىق كيىم كيۋگە، وتباسىمەن بىرگە تۇرۋعا جانە مەكەمەدەن تىس جەردە جۇمىس ىستەۋگە رۇقسات بەرىلەدى.
