Túrkistan qalasynda salt-dástúr men ulttyq qundylyqtardy dáriptegen «Ene men kelin» saiysy ótti, dep habarlaidy Dalanews.kz Túrkistan qalasy ákimdiginiń baspasóz qyzmetine silteme jasap.
Qalalyq «Belsendi uzaq ómir súrý ortalyǵynyń» uiymdastyrýymen ótken sharaǵa Túrkistan, Kentaý, Arys qalalary men Sozaq aýdanynan 6 otbasy qatysty. Saiystyń maqsaty – elimizdegi árbir shańyraqtyń tatý-tátti, úlgili bolýyn nasihattap, ene men kelin arasyndaǵy aýyzbirshilikti saqtaýǵa úles qosý. Jarasymdy januiany anyqtap, ónegeli otbasyn kópke úlgi etý.
Ulttyq salt-dástúrimizge sai ene men kelin shańyraqtyń uiytqysy men berekesi ekendigin uǵyndyrý. Anasy men qyzyndai syilasqan qatysýshylar umyt bolyp bara jatqan «Qursaq shashý» toiy, «Qazanjarys», «Tymaqqa salý», «Qyrqynan shyǵarý», «Tumar» siiaqty salt-dástúrlerimizden kórinis kórsetip, sóz sheberlikterin tanytyp, maqal-mátel aitýdan jarysqa tústi. Sondai-aq sheber qoldarymen keste tigip, qolónerden de kende emes ekendikterin dáleldedi. Ulttyq naqyshtaǵy kiim úlgisimen otbasylyq óner kórsetip, syilastyǵymen erekshelengen qatysýshylar arasynan joǵary upaimen júldege ie bolǵandar marapattalyp, syilyqtar tabystaldy.
Jiynda sóz alǵan oblystyq aqsaqaldar alqasynyń tóraǵasy Jarylqasyn Áziretbergenov pen qalalyq ardagerler keńesiniń tóraǵasy Jarqynbek Qulmaiymbetov búgingi saiystyń mańyzy joǵary ekenin atap, otbasynyń birligi – Otannyń beriktigi ekenine toqtaldy. Qazynaly qariialar mazmundy áńgimelerinde el bolamyz desek besigimizdi túzep, jas urpaqqa durys tálim-tárbie berý qajettigin aityp, árbir shańyraqqa baqytty, berekeli ǵumyr tiledi.
