تۇركىستان قالاسىندا ءسالت-داستۇر مەن ۇلتتىق قۇندىلىقتاردى دارىپتەگەن «ەنە مەن كەلىن» سايىسى ءوتتى، دەپ حابارلايدى Dalanews.kz تۇركىستان قالاسى اكىمدىگىنىڭ باسپا ءسوز قىزمەتىنە سىلتەمە جاساپ.
قالالىق «بەلسەندى ۇزاق ءومىر ءسۇرۋ ورتالىعىنىڭ» ۇيىمداستىرۋىمەن وتكەن شاراعا تۇركىستان، كەنتاۋ، ارىس قالالارى مەن سوزاق اۋدانىنان 6 وتباسى قاتىستى. سايىستىڭ ماقساتى – ەلىمىزدەگى ءاربىر شاڭىراقتىڭ ءتاتۋ-تاتتى، ۇلگىلى بولۋىن ناسيحاتتاپ، ەنە مەن كەلىن اراسىنداعى اۋىزبىرشىلىكتى ساقتاۋعا ۇلەس قوسۋ. جاراسىمدى جانۇيانى انىقتاپ، ونەگەلى وتباسىن كوپكە ۇلگى ەتۋ.
ۇلتتىق سالت-داستۇرىمىزگە ساي ەنە مەن كەلىن شاڭىراقتىڭ ۇيىتقىسى مەن بەرەكەسى ەكەندىگىن ۇعىندىرۋ. اناسى مەن قىزىنداي سىيلاسقان قاتىسۋشىلار ۇمىت بولىپ بارا جاتقان «قۇرساق شاشۋ» تويى، «قازانجارىس»، «تىماققا سالۋ»، «قىرقىنان شىعارۋ»، «تۇمار» سياقتى سالت-داستۇرلەرىمىزدەن كورىنىس كورسەتىپ، ءسوز شەبەرلىكتەرىن تانىتىپ، ماقال-ماتەل ايتۋدان جارىسقا ءتۇستى. سونداي-اق شەبەر قولدارىمەن كەستە تىگىپ، قولونەردەن دە كەندە ەمەس ەكەندىكتەرىن دالەلدەدى. ۇلتتىق ناقىشتاعى كيىم ۇلگىسىمەن وتباسىلىق ونەر كورسەتىپ، سىيلاستىعىمەن ەرەكشەلەنگەن قاتىسۋشىلار اراسىنان جوعارى ۇپايمەن جۇلدەگە يە بولعاندار ماراپاتتالىپ، سىيلىقتار تابىستالدى.
جيىندا ءسوز العان وبلىستىق اقساقالدار القاسىنىڭ ءتوراعاسى جارىلقاسىن ازىرەتبەرگەنوۆ پەن قالالىق ارداگەرلەر كەڭەسىنىڭ ءتوراعاسى جارقىنبەك قۇلمايىمبەتوۆ بۇگىنگى سايىستىڭ ماڭىزى جوعارى ەكەنىن اتاپ، وتباسىنىڭ بىرلىگى – وتاننىڭ بەرىكتىگى ەكەنىنە توقتالدى. قازىنالى قاريالار مازمۇندى اڭگىمەلەرىندە ەل بولامىز دەسەك بەسىگىمىزدى تۇزەپ، جاس ۇرپاققا دۇرىس تالىم-تاربيە بەرۋ قاجەتتىگىن ايتىپ، ءاربىر شاڭىراققا باقىتتى، بەرەكەلى عۇمىر تىلەدى.
