QHR-nyń Shanhai qalasyndaǵy ǵasyrǵa jýyq tarihy bar Broadway Mansions qonaq úiinde Visit Turkistan týristik aqparattyq keńsesi ashyldy, – dep habarlaidy Dalanews.kz
Keńseniń negizgi maqsaty – álemniń túkpir-túkpirinen keletin saiahatshylarǵa Túrkistan oblysynyń týristik áleýetin tanystyrý jáne óńirge týristerdi tartý.
Qazaqstan týrizmin halyqaralyq deńgeide nasihattaityn bul keńseniń ashylýyna Túrkistan oblysy ákiminiń birinshi orynbasary Zulpyhar Joldasov qatysyp, izgi nietin jetkizdi.
– Eki el arasyndaǵy bailanys birneshe ǵasyrǵa jalǵasyp keledi. Uly Jibek joly boiyndaǵy bul tarihi sabaqtastyq álem úshin de mańyzdy. Biz Qytaimen aradaǵy osy bailanysty iskerlik baǵytta jańǵyrtyp, Túrkistan oblysynyń týrizmin jańa deńgeige shyǵarǵymyz keledi. Keńsemizdiń ashylýyna úles qosqan SkyWay týroperatory men Shanhai týristik qaýymdastyǵyna alǵysymyz sheksiz, – dedi oblys ákiminiń orynbasary.
Shara aiasynda Túrkistan oblysynyń týrizm basqarmasy men China Corporate United Pavilion Group (CCUP) jáne SkyWay týristik operatory arasynda ózara yntymaqtastyq týraly memorandýmǵa qol qoiyldy.
Qytailyq týristik operatorlardyń qyzyǵýshylyǵy Túrkistanǵa jańa týristik aǵym qalyptastyrady degen senim bar. Bul kelisim óńirdiń halyqaralyq imidjin kóterip, týrizm salasyna investitsiia tartýǵa jáne mádeni bailanysty nyǵaitýǵa múmkindik beredi.
Qos taraptyń qoldaýymen Shanhaida ashylǵan keńse turaqty ári júieli jumys isteidi.
