قحر-نىڭ شانحاي قالاسىنداعى عاسىرعا جۋىق تاريحى بار Broadway Mansions قوناق ۇيىندە Visit Turkistan تۋريستىك اقپاراتتىق كەڭسەسى اشىلدى، – دەپ حابارلايدى Dalanews.kz

كەڭسەنىڭ نەگىزگى ماقساتى – الەمنىڭ تۇكپىر-تۇكپىرىنەن كەلەتىن ساياحاتشىلارعا تۇركىستان وبلىسىنىڭ تۋريستىك الەۋەتىن تانىستىرۋ جانە وڭىرگە تۋريستەردى تارتۋ.

قازاقستان ءتۋريزمىن حالىقارالىق دەڭگەيدە ناسيحاتتايتىن بۇل كەڭسەنىڭ اشىلۋىنا تۇركىستان وبلىسى اكىمىنىڭ ءبىرىنشى ورىنباسارى زۇلپىحار جولداسوۆ قاتىسىپ، ىزگى نيەتىن جەتكىزدى.

– ەكى ەل اراسىنداعى بايلانىس بىرنەشە عاسىرعا جالعاسىپ كەلەدى. ۇلى جىبەك جولى بويىنداعى بۇل تاريحي ساباقتاستىق الەم ءۇشىن دە ماڭىزدى. ءبىز قىتايمەن اراداعى وسى بايلانىستى ىسكەرلىك باعىتتا جاڭعىرتىپ، تۇركىستان وبلىسىنىڭ ءتۋريزمىن جاڭا دەڭگەيگە شىعارعىمىز كەلەدى. كەڭسەمىزدىڭ اشىلۋىنا ۇلەس قوسقان SkyWay تۋروپەراتورى مەن شانحاي تۋريستىك قاۋىمداستىعىنا العىسىمىز شەكسىز، – دەدى وبلىس اكىمىنىڭ ورىنباسارى.

شارا اياسىندا تۇركىستان وبلىسىنىڭ تۋريزم باسقارماسى مەن China Corporate United Pavilion Group (CCUP) جانە SkyWay تۋريستىك وپەراتورى اراسىندا ءوزارا ىنتىماقتاستىق تۋرالى مەموراندۋمعا قول قويىلدى.

قىتايلىق تۋريستىك وپەراتورلاردىڭ قىزىعۋشىلىعى تۇركىستانعا جاڭا تۋريستىك اعىم قالىپتاستىرادى دەگەن سەنىم بار. بۇل كەلىسىم ءوڭىردىڭ حالىقارالىق ءيميدجىن كوتەرىپ، تۋريزم سالاسىنا ينۆەستيسيا تارتۋعا جانە مادەني بايلانىستى نىعايتۋعا مۇمكىندىك بەرەدى.

قوس تاراپتىڭ قولداۋىمەن شانحايدا اشىلعان كەڭسە تۇراقتى ءارى جۇيەلى جۇمىس ىستەيدى.