Túlkibastyń aq jaýylyqty ájeleri Astanadan júldemen oraldy
Is-sharanyń bas uiymdastyrýshysy Qazaq radiosynyń jýrnalisi Gúlmira Nálibai men «Mereke» prodiýserlik ortalyǵy. Mine, osyndai igi bastama kópshilik qaýym ortasynda qoldaý tapsa kerek, uiymdastyrýshylar ekinshi márte ótkizýdi qolǵa aldy. Sóitip ótken aptanyń qazanshýaq kúnderinde túlkibastyq bir top ájelerimiz Almatyǵa qarai dál osy baiqaýǵa baq synaý úshin jolǵa shyqty. Árine, bizdiń aýdannyń ájeleri osal emes. Jylda aýdan-oblys kóleminde merekelik is-sharalarda boi kórsetip, ábden sahnaǵa tóselgen, qazaqy salt-dástúrdi de, qolónerdi de, sheshen sóilei bilýdi de, kerek deseńiz qazaqy naqyshta án aityp, bidi de bilep júrgen belsendi apalarymyzdyń bul baiqaýda ozyq kórinetinine senimdi de boldyq.
Baiqaýdyń bas-qasynda júrip uiytqy bolǵan Gúlmira Nálibai:
– Bul baiqaýdyń maqsaty – 50 men 90 jas aralyǵyndaǵy, búginde beinetiniń zeinetin kórip otyrǵan ata-apalarymyzǵa rýhani qoldaý kórsetip, boiyndaǵy ónerin jas kúnindegidei qaita bir shyńdaýyna múmkindik syilaý, umyt bolǵan ánder men kúilerdi qaita jan-dandyrý; el arasynda júrgen on saýsaǵy¬nan óneri tamǵan sheberlerimizdi nasihat¬taý, ulttyq ónerdiń jańǵyrýyna jol ashý; úlkenderimizdiń nemere-shóberelerine arnap án aitýy men bata berýin kópke dáripteý; joǵalyp bara jatqan qazaqy tárbieni saqtap qalýǵa atsalysý, - deidi.
Osyndai ǵurypqa baǵyttalǵan baiqaýǵa elimizdiń kóptegen oblystary, máselen Almaty, Qaraǵandy, Túrkistan, Qyzylorda, Aqtóbe oblystary nyń aýdan, aýyldarynan, sonymen birge Almaty, Shymkent, Taraz qalasynan kelgen ónerli ata-ájeler boldy. Olar «Án salý», «Hormen án salý», «Dástúrli án», «Mánerlep óleń oqý», «Aqyndyq óner», «Aspapta oinaý», «Qolóner», «Bata berý», «Sýretshilik óner» syndy ár janrda ónerlerin ortaǵa saldy. Úmitkerlerdiń eń jasy elýde bolsa, eń úlkeni seksendegi áje boldy. Sonyń ishinde túlkibastyq ájeler ózderiniń ustamdylyǵymen, sahna mádenietin saqtai bilýimen, ulttyq kiimdi birkelki tartymdy kiinýimen, ásirese kieli kimeshekteriniń ulttyq naqyshqa sai bolýymen jáne ár tapsyrmany naq oryndaýymen erekshe kózge túse bildi.
Almatydaǵy óner saiysyna apalarymyzdy aýdandyq ájeler alqasynyń tóraiymy Gúlbúbi Eshenqulova bastap apardy jáne aýdan ákiminiń orynbasary Ashat Jabaǵy ájelerimizdiń jol-shyǵyndaryn kóterýge atsalysqanyn aita keteiik. «Aýylyńda qazynaly qartyń bolsa, jazyp qoiǵan hatpen teń» dep beker aitylmaǵan ǵoi, altyn kómbe sekildi, aýzy dýaly, sózi ýájdi ata-apalarymyzdyń tereńnen súzip aitqan ár sózin jazyp, kóneden aqtarǵan shejiresin oiǵa túiip qalmasaq, azamattyǵymyzǵa syn emes pe?
Baiqaýda «Aqbaqai» ánimen túlkibastyq áje Kúmiskúl Tursynbekova bas júldeni iemdendi. Mánerlep oqýdan Kázima Úmbetálieva, dátúrli ánnen Záýre Tilenshieva, án salýdan jáne quraq quraýdan Áshirkúl Nuraqbaeva, ulttyq qolóneerden Seisekúl Sataeva, músin figýrkalar jasaýdan Ońlasyn Jortanova, bi ónerinen Altynsha Jaýylbaeva birinshi oryndy ielendi. Sondai-aq, ájelerimiz halyq áni «Ýgaiym-aidy» hormen oryndap shyqty, joǵaryda aty atalǵan apalarymyzben birge Kúlásh Júnisbekova, Kúlzinat Shymbekova, Saparkúl Dýlatova, Biban Jumaǵulova horǵa qatysty. Mine, aýdan namysyn jibermei, týdai jelbiretip kóterip qaitqan, janarlarynan meiirim nury tógilgen osyndai altyn dariia, asyl ájelerimiz qandai qurmetke de laiyqty.
«Dalanews» aqparat
