Internet keńistigine júrgizilgen monitoring barysynda politsiia qyzmetkerleri TikTok jáne Instagram áleýmettik jelilerinde beiádep sózder aitylǵan beinejazbany anyqtady, dep habarlaidy dalanews.kz.
Tekserý nátijesinde avtordyń, quqyq buzýshynyń jeke basy anyqtaldy. Ol – Aqtóbe oblysynyń 38 jastaǵy turǵyny Sanat Nurtaev. Atalǵan azamat qoldanystaǵy zańnamaǵa sáikes ákimshilik jaýapkershilikke tartyldy.
Politsiia áleýmettik jelilerdiń kópshilikke qoljetimdi qoǵamdyq keńistik ekenin eske salady. Sondyqtan Qazaqstan Respýblikasynyń qoldanystaǵy zańnamasynyń talaptary internet paidalanýshylarynyń áreketterine de tolyq kólemde qoldanylady.
Eske salaiyq, buǵan deiin Abai oblysynda TikTok-ta tikelei efirde balaǵat sóz aitqan jeli qoldanýshysy qamaýǵa alynǵan bolatyn.
Sonymen qatar, Ishki ister ministrligi áleýmettik jelilerde zańǵa qaishy kontent taratqan toǵyz avtordy ákimshilik jaýapkershilikke tartty.
