Bul aqparatty birqatar Telegram jelisindegi haipsúier kanaldar da jarysa jariialaǵan edi. Jalaqylaryn 100%-ǵa kóterý týraly talap qoiǵan bastamashyl toptyń yntasyn qoldap úndeý jariialaǵan áielderdiń beinejazbasy biliktiń kem ketigin terip otyratyn nasihatshyl toptarǵa ońynan kelgeni ras.
Alaida, máseleniń aq pen qarasyn ajyratyp kórsek?!
«QTJ» UK» kompaniiasy elimizdegi eń iri alpaýyt, júie quraýshy kompaniialardyń biri. Memleket ishindegi memleket deýge de bolady.
Mundai kúrdeli kompaniialardyń basqarý kesheni men adam resýrstary, eńbek áleýetiniń esebi men qyzmetkerge baǵyttalǵan óz saiasaty, zamanaýi basqarý tetikterine negizdelgen óz qundylyqtary men qurylymy bar.
Osy jyldyń shilde aiynan bastap temirjolshylardyń eńbekaqysyn tóleýdiń oblystyq koeffitsientterine kezeń-kezeńimen kóshý jobasy sonyń biri.
Árine, mundai eńbek tóleminiń koeffitsienttik nemese KPI júieleri shalǵaidaǵy shoiyn jolda qyzmet etip júrgen qarapaiym qyzmetkerge túsiniksiz nemese ádiletsiz bolyp kórinýi múmkin.
Óz kezeginde QTJ eńbek ujymdarynda eńbekaqy tóleý júiesine jańa tásilderdi engizý máseleleri boiynsha túsindirý jumystaryn da júrgizý kerek.
Kompaniianyń resmi saitynda qyzmetkerlerdiń áleýmettik-ekonomikalyq jaǵdaiyn jaqsartý boiynsha josparly jumystarynyń eseptik kórsetkishteri kórsetilgen eken.
Óndiristik personaldaǵy qyzmetkerleriniń jalaqy deńgeiin ótken jylǵy kórsetkishpen salystyrǵanda 41%-ke artyp, bul maqsatqa 133 mlrd. teńge bólingen.
2013 jyldan beri óndiristik personaldyń jalaqysy mundai deńgeide óspegen.
Jalpy kompaniianyń negizgi tabysy júk jáne jolaýshylar tasymalyna negizdelgenin jáne osy tabystan qyzmetkerler jalaqy alyp otyrǵanyn eskersek, 2020 jylmen salystyrǵanda kompaniianyń jalpy tabysynyń kólemi 7,4 ese ósken.
Ótken jyly temirjol kóliginiń paidalanylǵan júk ainalymy 239,3 mlrd tonna/km-ge jetip, «Qazaqstan temir joly» UK» AQ-nyń qorytyndy tabysy 120,6 mlrd teńgeni quraǵan.
Bul nátijeniń qorytyndysynda júrgizilgen is-sharalar esebinen 2021-2022 jyldary óndiristik personal qyzmetkerleriniń eńbekaqysynyń ósimi ortasha eseppen 50% quraǵan. Biyldyń ózinde óndiristik qyzmetkerlerdiń jalaqysyn kóterýge 70 mlrd.teńgeden astam qarajat bólinip otyr eken.
Eńbekaqy tóleý qorlarynyń koeffitsenttik júiesi men effektivtilik turǵysynan ádil jáne adami faktorlardan ada bolatynyna senimmen qaraýǵa bolady. Sebebi búginde bul protsessterdiń barlyǵy tsifrly avtomattandyrylǵan baǵdarlamalardan turady.
Alaida, mundai jańashyldyqtardyń barlyǵyn óńirlerdegi eńbek aktivterine qarapaiym tilmen túsindire de alý kerek. Mańǵystaýdaǵy temirjolshylardyń da júz paiyz ósim surap jatqandyǵy da osyndai aǵartýshylyq jumystardyń kemshindiginen bolýy múmkin.
Ekonomikada mýltiplikativti effekt degen tujyrym bar, maǵynasy bir-birine bailanysty júielerdiń bir-birine áseri. Qarapaiym tilmen aitqanda domino tastarynyń bir-birine súienip qulaýymen túsindirýge bolady.
Máselen, keshegi Beineýdegi temirjolshylardyń talaby oryndaldy delik, alaida dál sondai eńbek etip júrgen temirjolshy Qandyaǵash pen Qazalyda da bar nemese Qazaqstannyń árbir temirjol beketinde.
Onda barlyq qazaqstandyq temirjol beketterindegi óndiristegi 100 myńnan astam qyzmetkerdiń jalaqysyn kóterý kerek degen sóz.
Al, bul qyzmetkerlerdiń eńbekaqysynyń kólemi QTJ kompaniiasynyń jalpy tabysymen birden-bir bailanysty ekenine nazar salsaq, QTJ óz kezeginde jolaýshylar tasymaly men júk tasymalyndaǵy tarifterdi kóterý kerek bolady degen maǵynaǵa saiady.
Júk tasymalynyń tarifteri kóteriletin bolsa, barlyq shoiyn jolda tasymaldanyp jatqan taýarlardyń baǵalary da ózgeredi, iaǵni qurylys, tehnika men kúndelikti turmystyq taýarlardyń da baǵasy ósedi demek. Jolaýshylar tasymalyndaǵy bilet quny aitpasa da túsinikti.
Iá, kieli Mańǵystaý jeri ózderiniń talapshyl jáne ór minezdi geografiialyq, etnikalyq erekshelikterimen elge aian. Biraq, sońǵy otandyq osyndai talaptar qoiý tarihyna qaraityn bolsaq, mańǵystaýlyqtardyń ǵana emes dúiim eldiń tynyshtyǵyn oilaǵan resmi bilik bul jerdiń azamattaryn jeńil jáne kei jaǵdaida ólshemsiz qoiylǵan suranystaryn oryndaimyn dep jaman da úiretip alǵan sekildi.
Talaptyń da talaby, ótinishtiń de ótinishi bolady, biraq qazaq halqy tek qana Mańǵystaýda ómir súrip jatqan joq. Sony eskersek.
