Qonaev qalasynda respýblıkalyq «Taza Qazaqstan» ekonaýqany jalǵasýda. Naýqan aıasynda qalany qoqystan tazartý jumystary qarqyndy júrýde, – dep habarlaıdy Dalanews.kz Almaty oblysy ákiminiń baspasóz qyzmetine silteme jasap.

TÚKSH bóliminiń málimetinshe, aptasyna qaladan 600 tonna qatty qaldyqtar shyǵarylǵan.  

– Shomylý maýsymynyń bastalýyna baılanysty qalada týrıser aǵyny óte kóp. Barlyq kúshti jaǵajaılardy tazalaýǵa jumsap jatyrmyz. Mysaly, qalalyq №7 jaǵajaıdyń ózinde 59 qoqys jáshigi ornatylǵan. Kúnine 90 tonna qaldyq shyǵarylady. Al qalanyń ishinen kúndelikti 10-12 tonna qoqys jınalady, – dedi TÚKSH bólimi basshysynyń orynbasary Ashat Jeksenbek.

Sondaı-aq, saıabaqtar men skverler de únemi tazalanýda. Ótken aptada bir kúnniń ishinde 12 shaqyrym aryq tazartylǵan. Qosymsha aǵashtardy sanıtarly kesý jumystary júrýde. Tazalyqqa kúndelikti 120 adam, 14 tehnıka jumyldyrylyp jatyr.