Almaty oblysynyń kieli Kegen topyraǵynda mektep oqýshylary arasynda dástúrli ánshiler men kúishilerdiń «Táńirtaý talanttary» atty aimaqtyq baiqaýy joǵary deńgeide ótti. Hantáńiri baýraiyn án men kúige bólegen bul shara Prezident Q.K. Toqaevtyń aimaqtardy rýhani qýattandyrý jáne azamattyq belsendilikti arttyrý týraly bastamasy aiasynda uiymdastyryldy, dep habarlaidy dalanews.kz.
Baiqaýdyń negizgi maqsaty - Jetisý ánshilik jáne kúishilik mektebiniń iri ókilderi, ómirden erte ketken óner sańlaqtarynyń rýhyn ulyqtaý. Atap aitqanda, QR Mádeniet qairatkerleri Jaqsylyq Myrqaev pen Erlan Stamǵaziev, ónertanýshy-zertteýshi Bazaraly Múptekeev jáne halyqaralyq laýreat, folklortanýshy Ǵalymjan Dosanulynyń esimderi men muralary jas urpaqqa keńinen nasihattaldy.
Baiqaýdyń qazylar alqasyna tóraǵalyq etken QR Halyq ártisi Ramazan Stamǵaziev sharanyń mańyzyna toqtalyp:
«Búgin Alataýdyń etegi, Han Táńiriniń baýraiynda, Kegen aýdanynda, Almaty oblysynyń barlyq aýdandarynda jasóspirimderdiń úlken baiqaýyn Kegen aýdanynyń ortalyǵyna «Táńirtaý talanttary» atty baiqaýǵa jinadyq.
Bas-aiaǵy 45-ke jýyq ónerpazdar keldi: ánshiler, kúishiler. Árqaisysy sonaý kóneden kele jatqan halyq kúilerin, halyq ánderin, halyq kompozitorlarynyń, keiingi zaman kompozitorlarynyń kóptegen ánderi sahnada shyrqaldy.
Bul konkýrstyń negizgi baǵyty - jastarǵa jol ashý, jalpy úlken ónerge qarai tartý. Sonymen birge, bizdiń ózimniń jan dosym Ǵalymjan Dosanov jáne ózimniń týǵan inim Erlan Stamǵazievtiń ómirden ótkenine, solardy eske ala júrýine arnalǵan bir rýhtyq baiqaý bolatyn.
Endi qarasam, qazir oblys kóleminde bul baiqaý ulǵaidy. Sol baýyrlarymyzdyń ókshesin basqan jastardy kórip qýanam. El aman bolsyn! Besiginde án men jyrǵa terbelgen jastarymyzdyń qatary kóbeigenine qýanam.», - dep atap ótti.
Óner dodasyna Almaty oblysynyń Kegen, Raiymbek, Uiǵyr, Eńbekshiqazaq jáne Jetisý oblysy, Panfilov (Jarkent) aýdandarynan iriktelgen 45-ke jýyq daryndy oqýshy qatysty. Úmitkerler eki nominatsiia boiynsha baq synady:
- «Dástúrli án»: Halyq ánderi men halyq kompozitorlarynyń, sondai-aq zamanaýi avtorlardyń shyǵarmalary shyrqaldy.
- «Dástúrli kúi»: Jas kúishiler kóneden jetken kúi óneriniń oryndaýshylyq sheberligin pash etti.
Baiqaý tek sahnalyq ónermen shektelmei, mańyzdy ekologiialyq-tárbielik sharamen jalǵasty. Baiqaýdyń ádil qazylary men uiymdastyrýshylary Kegen aýdanynda jas kóshetter egip, «Talanttar alleiasynyń» negizin qalady. Bul simvolikalyq qadam - tabiǵatty aialaý men ónerdiń máńgilik ómirsheńdigin, ónerpazdar men kóshetterdiń birge boi túzep, órken jaiýyn bildiredi.
Qazylar alqasynyń sheshimimen eń úzdik dep tanylǵan talanttar dástúrli óner sańlaqtary atyndaǵy arnaiy syilyqtarmen marapattaldy:
- Ánshiler úshin: Ǵalymjan Dosanuly, Erlan Stamǵaziev jáne Máken Áliasqarov atyndaǵy júldeler.
- Kúishiler úshin: Qojekeuly Raqysh, Muqan Nursadyqov jáne Bazaráli Múptekeev atyndaǵy syilyqtar.
Uiymdastyrýshylar (Almaty oblysy Bilim basqarmasy men Kegen aýdany ákimdigi) bul baiqaýdy jyl saiynǵy dástúrge ainaldyrýdy kózdep otyr. Hantáńiri baýraiyndaǵy bul rýhani qozǵalys — ulttyq kodty saqtaýdyń jáne jas urpaqty otansúigishtikke baýlýdyń naqty quralyna ainaldy.
