2014 jyldyń 8 naýryzynda Malaysia Airlines áýe kompaniiasyna tiesili Boeing 777-200ER ushaǵynyń joǵalýy álem aviatsiiasyndaǵy eń qupiia oqiǵalardyń biri bolyp qaldy, dep habarlaidy dalanews.kz.
Kýala-Lýmpýrdan Beijińge baǵyt alǵan lainer áýege kóterilgennen keiin shamamen 40 minýt ótkende Ońtústik Qytai teńizi ústinde radardan joǵalyp ketken. Ushaq bortynda 227 jolaýshy men 12 ekipaj múshesi bolǵan. Alaida arada qansha jyl ótse de, apattyń naqty sebebi men ushaqtyń qai jerge qulaǵany tolyq anyqtalǵan joq.
Bailanys úzilgennen keiin áýe kemesi birneshe saǵat boiy ushqan bolýy múmkin degen derekter bar. Áskeri radarlar ushaqtyń baǵytyn ózgertip, Malakka buǵazy arqyly Úndi muhitynyń ońtústik bóligine qarai ketkenin tirkegen.
Lainer sońǵy ret Nikobar araldary mańynda baiqalǵan. Keiin Afrika jaǵalaýynan tabylǵan keibir bólshekter joǵalǵan Boeing ushaǵyna tiesili bolýy múmkin degen boljam aityldy. Degenmen bul derekter ushaqtyń taǵdyryn tolyq ashýǵa jetkiliksiz boldy.
Ushaqtaǵy jolaýshylar 14 eldiń azamaty bolǵan. Olardyń basym bóligi Qytaidan edi. Sondai-aq bortta reseilik kásipker Nikolai Brodskii de bolǵany aityldy.
Tergeý kezinde urlanǵan tólqujatpen mingen eki jolaýshyǵa da nazar aýdaryldy. Olar Pýriia Nýr Mohammad Merdad pen Seied Mohammed Reza Delavar bolǵan. Alaida keiin olardyń lańkestik áreketke qatysy joq ekeni, tek shetelge zańsyz shyǵýǵa tyrysqany anyqtaldy.
Sonymen qatar tergeýshiler ushaq komandiri Zahari Ahmad Shahtyń jeke ómirin de zerttedi. Tájiribeli pilottyń ajyrasýdan keiin kúizeliske túskeni týraly boljamdar aityldy. Keibir nusqalarda ekinshi pilot Farik Abdýl Hamidtiń de áreketi qarastyrylǵan.
Ushaq joǵalar aldynda dispetcherler estigen sońǵy sóz «Qaiyrly tún» bolǵan. Sodan keiin bailanys úzilip, lainer iz-túzsiz ǵaiyp boldy. Búginge deiin osy bir qysqa ǵana sóz álemdi tolǵandyrǵan úlken qupiianyń simvolyna ainalyp otyr.
