Jezqazǵanda Meditsina qyzmetkeri kúnine arnalǵan saltanatty shara ótip, sala mamandary marapattaldy, dep habarlaidy Dala News.
Merekelik jiynda «Qazaqmys korporatsiiasy» JShS basqarma tóraǵasynyń mindetin atqarýshynyń orynbasary Muqan Úńgetbaev, Ulytaý oblystyq densaýlyq saqtaý basqarmasynyń basshysy Rústem Nysambaev jáne «KásipQorǵan» kásipodaǵynyń tóraǵasy Ýálihan Nurjanov meditsina qyzmetkerlerin kásibi merekemen quttyqtady.
Muqan Úńgetbaev Jezqazǵan meditsinalyq ortalyǵynyń óńir úshin mańyzy erekshe ekenin atap ótti. Onyń aitýynsha, ortalyq kópsalaly meditsinalyq kómekti óndiristik meditsinamen ushtastyryp, elimizdegi iri óndiris oryndarynyń birinde eńbek etetin jumysshylardyń densaýlyǵyn qorǵaýdy qamtamasyz etip otyr.
«Sońǵy jyldary Meditsinalyq ortalyqtyń qol jetkizgen jetistikteri zor qurmetke laiyq. Árbir jańa baǵyttyń, engizilgen tehnologiianyń jáne aman qalǵan árbir adamnyń artynda sizderdiń bilimderińiz, jaýapkershilikterińiz jáne adamdarǵa kómektesýge degen shynaiy nietterińiz tur», – dedi Muqan Úńgetbaev.
Búginde Jezqazǵan meditsinalyq ortalyǵy Ortalyq Qazaqstandaǵy eń iri meditsinalyq mekemelerdiń biri sanalady. Munda shamamen 1200 adam jumys isteidi, onyń 900-ge jýyǵy – meditsina qyzmetkerleri. Jyl saiyn statsionarlyq emdi 13 myńǵa jýyq adam alady, al emhanalarda 43 myńnan astam turǵynǵa meditsinalyq kómek kórsetiledi.
Saltanatty shara barysynda úzdik mamandar vedomstvolyq jáne korporativtik marapattarǵa ie bolyp, meditsina salasynyń ardagerlerine estelik syilyqtar tabystaldy.
«Qazaqmys» kompaniialar tobynda densaýlyq saqtaý salasyn damytý áleýmettik saiasattyń mańyzdy baǵyttarynyń biri retinde qarastyrylady. 2026 jyly Jezqazǵan meditsinalyq ortalyǵyn damytýǵa shamamen 1,3 mlrd teńge bólinedi. Budan bólek, kardiohirýrgiia qyzmetin damytýǵa, zamanaýi meditsinalyq jabdyqtar satyp alýǵa jáne óndiristik nysandardaǵy meditsinalyq pýnktterdi jabdyqtaýǵa taǵy 500 mln teńge investitsiia salý josparlanǵan.
Kompaniiada meditsina qyzmetkerlerin qoldaý, zamanaýi meditsinalyq infraqurylymdy damytý jáne meditsinalyq kómektiń sapasyn arttyrý óńirlerdegi áleýmettik jaýapkershiliktiń mańyzdy bóligi bolyp qala beretini atap ótildi.
