Saltanat saraıynyń ashylý rásimi 15 jas juptyń oryndaýyndaǵy «Mahabbat válsi» bıimen bastaldy. Bı sońynan kógershin men júrek beıneli sharlar ushyrý sáti de sharaǵa erekshe kórik berdi. Saraıdyń ashylýyna altyn jáne laǵyl toılaryn atap ótkeli otyrǵan 2 otbasynyń ıeleri negizgi qonaq retinde arnaıy qatysty. Kópshilikti qýanyshty sátpen quttyqtaǵan oblys ákimi A. Batalov:
– Qurmetti taldyqorǵandyqtar! Búgin biz jańadan turǵyzylǵan, zamanaýı, kelisti de kelbetti Saltanat saraıyn ashyp otyrmyz. Munda tek neke qıý rásimi ǵana oryndalyp qoımaıdy, sonymen qatar túrli deńgeıdegi sharalar da ótkiziletin bolady. Dese de, bul saraı eń aldymen adam ómiriniń eń mańyzdy belesi – otbasyn qurý rásiminiń erekshe qýanysh ekenin aıshyqtaý úshin, umytylmastaı este qaldyrý úshin qyzmet etetin bolady. Jańa Saltanat saraıynda nekege otyratyn jastar sany kóbeıip, berekesi myqty otbasylardyń qataryn tolyqtyratynyna senimdimin. Bul – Memleket basshysynyń tapsyrmalaryn basshylyqqa ala otyryp, elimizdiń demografıalyq jaǵdaıyn jaqsartý baǵytyndaǵy saıasatty júzege asyrý qadamdarynyń biri. Jas jubaılarǵa jaqsylyq pen baqytty ǵumyr tileımin! – dedi A. Batalov.
Ǵımarattyń kógildir lentasy qıylǵannan keıin qatysýshylar men shara qonaqtary neke qıý zalyna ótip, osy saraıdyń tabaldyryǵyn alǵashqy bolyp attaǵan 2 juptyń neke qıý rásimine kýá boldy. Oblys basshysy jas otaý ıelerine jáne shańyraq kótergenderine 50 jáne 60 jyl bolǵan sharanyń qurmetti qonaqtaryna estelik syılyqtar tabystady.
Saltanatty sharadan keıin jınalǵandar saraı ishin aralap kórdi.
Búginge deıin uzaq jyl boıy Taldyqorǵanda neke qıý rásimi, ıaǵnı AHAJ jumysy beıimdelgen ǵımaratta atqarylyp keldi. Sondyqtan arnaıy ǵımarat turǵyzýdyń qajettiligi týyndaǵan. Jańa Saltanat saraıynyń jobasyn jasaýshylar oblys ákiminiń turaqty qadaǵalaýymen saraıdyń atyna zaty saı bolýy úshin usaq-túıekke deıin mán berip, árbir detaldiń úılesimde bolýyn qarastyrdy.
Saltanat saraıynyń ishi altyndalǵan túspen ásemdelgen, japsyrma áshekeılermen árlengen. Kúıeý jigit pen qalyńdyqqa arnalǵan bólmeler, neke qıýǵa arnalǵan saltanatty zal, qonaqtarǵa arnalǵan kútý zaly, 350 orynǵa laıyqtalǵan meıramhana, keń hol, jıyn ótkizetin zal bar. Nysannyń smetalyq quny 1 mlrd. 360 myń teńge. Ǵımarattyń jalpy alańy – 3531,5 sharshy metr. Ǵımarat kóp salaly bolǵandyqtan basqa da keń aýqymdy túrli sharalar ótkizýge bolady.
https://dalanews.kz/31877
