تالدىقورعاندا رەسمي اشىلۋى وتكەن سالتانات سارايىندا ەكى جۇپ نەكەلەرىن قيدىردى. جاس جۇبايلاردى وبلىس اكىمى اماندىق باتالوۆ قۇتتىقتادى، – دەپ حابارلايدى الماتى وبلىسى اكىمىنىڭ باسپا ءسوز قىزمەتى.

سالتانات سارايىنىڭ اشىلۋ ءراسىمى 15 جاس جۇپتىڭ ورىنداۋىنداعى «ماحاببات ءۆالسى» بيىمەن باستالدى. بي سوڭىنان كوگەرشىن مەن جۇرەك بەينەلى شارلار ۇشىرۋ ءساتى دە شاراعا ەرەكشە كورىك بەردى. سارايدىڭ اشىلۋىنا التىن جانە لاعىل تويلارىن اتاپ وتكەلى وتىرعان 2 وتباسىنىڭ يەلەرى نەگىزگى قوناق رەتىندە ارنايى قاتىستى. كوپشىلىكتى قۋانىشتى ساتپەن قۇتتىقتاعان وبلىس اكىمى ا. باتالوۆ:



– قۇرمەتتى تالدىقورعاندىقتار! بۇگىن ءبىز جاڭادان تۇرعىزىلعان، زاماناۋي، كەلىستى دە كەلبەتتى سالتانات سارايىن اشىپ وتىرمىز. مۇندا تەك نەكە قيۋ ءراسىمى عانا ورىندالىپ قويمايدى، سونىمەن قاتار ءتۇرلى دەڭگەيدەگى شارالار دا وتكىزىلەتىن بولادى. دەسە دە، بۇل ساراي ەڭ الدىمەن ادام ءومىرىنىڭ ەڭ ماڭىزدى بەلەسى – وتباسىن قۇرۋ ءراسىمىنىڭ ەرەكشە قۋانىش ەكەنىن ايشىقتاۋ ءۇشىن، ۇمىتىلماستاي ەستە قالدىرۋ ءۇشىن قىزمەت ەتەتىن بولادى. جاڭا سالتانات سارايىندا نەكەگە وتىراتىن جاستار سانى كوبەيىپ، بەرەكەسى مىقتى وتباسىلاردىڭ قاتارىن تولىقتىراتىنىنا سەنىمدىمىن. بۇل – مەملەكەت باسشىسىنىڭ تاپسىرمالارىن باسشىلىققا الا وتىرىپ، ەلىمىزدىڭ دەموگرافيالىق جاعدايىن جاقسارتۋ باعىتىنداعى ساياساتتى جۇزەگە اسىرۋ قادامدارىنىڭ ءبىرى. جاس جۇبايلارعا جاقسىلىق پەن باقىتتى عۇمىر تىلەيمىن! – دەدى ا. باتالوۆ.

عيماراتتىڭ كوگىلدىر لەنتاسى قيىلعاننان كەيىن قاتىسۋشىلار مەن شارا قوناقتارى نەكە قيۋ زالىنا ءوتىپ، وسى سارايدىڭ تابالدىرىعىن العاشقى بولىپ اتتاعان 2 جۇپتىڭ نەكە قيۋ راسىمىنە كۋا بولدى. وبلىس باسشىسى جاس وتاۋ يەلەرىنە جانە شاڭىراق كوتەرگەندەرىنە 50 جانە 60 جىل بولعان شارانىڭ قۇرمەتتى قوناقتارىنا ەستەلىك سىيلىقتار تابىستادى.

سالتاناتتى شارادان كەيىن جينالعاندار ساراي ءىشىن ارالاپ كوردى.

بۇگىنگە دەيىن ۇزاق جىل بويى تالدىقورعاندا نەكە قيۋ ءراسىمى، ياعني احاج جۇمىسى بەيىمدەلگەن عيماراتتا اتقارىلىپ كەلدى. سوندىقتان ارنايى عيمارات تۇرعىزۋدىڭ قاجەتتىلىگى تۋىنداعان. جاڭا سالتانات سارايىنىڭ جوباسىن جاساۋشىلار وبلىس اكىمىنىڭ تۇراقتى قاداعالاۋىمەن سارايدىڭ اتىنا زاتى ساي بولۋى ءۇشىن  ۇساق-تۇيەككە دەيىن ءمان بەرىپ، ءاربىر دەتالدىڭ ۇيلەسىمدە بولۋىن قاراستىردى.

سالتانات سارايىنىڭ ءىشى التىندالعان تۇسپەن اسەمدەلگەن، جاپسىرما اشەكەيلەرمەن ارلەنگەن. كۇيەۋ جىگىت پەن قالىڭدىققا ارنالعان بولمەلەر، نەكە قيۋعا ارنالعان سالتاناتتى زال، قوناقتارعا ارنالعان كۇتۋ زالى، 350 ورىنعا لايىقتالعان مەيرامحانا، كەڭ حولل، جيىن وتكىزەتىن زال بار. نىساننىڭ سمەتالىق قۇنى 1 ملرد. 360 مىڭ تەڭگە. عيماراتتىڭ جالپى الاڭى – 3531،5 شارشى مەتر. عيمارات كوپ سالالى بولعاندىقتان باسقا دا كەڭ اۋقىمدى ءتۇرلى شارالار وتكىزۋگە بولادى.



 

https://dalanews.kz/31877