Qyrkúiek aiynyń ortasynda elimizde egindi sýǵarý maýsymy aiaqtalady. Biyl qurǵaqshylyqqa qatysty boljamdarǵa qaramastan, QR Sý resýrstary jáne irrigatsiia ministrligi tótenshe jaǵdailardyń, sýǵarý sýynyń tapshylyǵynyń aldyn alýǵa, ótken jyldyń tájiribesinen sabaq alýǵa jáne agrarshylardy úzdiksiz sýǵarý sýmen qamtamasyz etýge qol jetkizgen.
Sýǵarý maýsymy barysynda agrarshylarǵa shamamen 11 milliard tekshe metr sýdy paidalanǵan. Ministrlikke qarasty «Qazsýshar» uiymynyń filialdary sharýa qojalyqtarymen sýǵarý sýyn jetkizý boiynsha shamamen 25 myń kelisimshart jasasqany málim boldy.
Eń kóp sý alǵan óńirler – Qyzylorda oblysy (shamamen 3,5 milliard tekshe metr), Túrkistan oblysy (shamamen 3,2 milliard tekshe metr), Jetisý oblysy (1,2 milliard tekshe metrden astam), jáne Jambyl oblysy (1 milliard tekshe metr) qurap otyr.
– Elimizde sýǵarý kezeńinde josparlanǵan jumystar negizinen úsh baǵyt boiynsha júrdi. Birinshisi keńzeńde – sý qoimalaryn toltyrý. Kóp jyldar boiy, tipti keide tarihta alǵash ret, sý tasqyny kezinde sý qoimalary 100% toltyryldy.
Ekinshisi – «sý diplomatiiasy», iaǵni elimizdiń geografiialyq ornalasýyna bailanysty ásirese ońtústik óńirler úshin mańyzdy kórshi eldermen kelissózder men mámileler jasaý. Úshinshisi – gidrotehnikalyq qurylǵylardy daiyndaý: jóndeý jumystary, qaita qurý, arnalardy tazalaý, irrigatsiialyq jelilerdi daiyndaý jáne basqa da uiymdastyrýshylyq máseleler, – deidi Sý resýrstary jáne irrigatsiia ministrliginiń resmi ókili Móldir Ábdýálieva.
Birinshi baǵyt boiynsha sý tasqyny kezinde eldegi sý qoimalaryna 75 milliard tekshe metr sý jinalǵan. Bul ótken jylmen salystyrǵanda 15 milliard tekshe metrge artyq. Jinalǵan sýdyń 12 milliard tekshe metrden astamy – tasqyn sýy. Búgingi tańda Qazaqstannyń soltústik, ortalyq, shyǵys jáne batys óńirlerindegi sý qoimalary 80%-ǵa toltyrylǵan.
Maýsym kezinde ministrlik qyzmetkerleri 100-den astam gidropostty jóndep, qaita qalpyna keltirgen. Sonymen qatar 700 shaqyrymnan astam kanaldardy tazartty, 1000-nan astam gidrotehnikalyq qurylǵylarǵa attestatsiia júrgizipti. Sonymen qatar 11 óńirde 98 gidrotehnikalyq qurylǵy jóndeldi.
Al «Sý diplomatiiasy» baǵyty boiynsha kórshi eldermen birlesken jumystyń arqasynda ministrlik Qazaqstannyń ońtústik óńirlerin qajetti kólemdegi sýmen qamtamasyz etti. Biyl sýǵarý maýsymynda kórshi elderden kelgen sý kólemi bastapqy boljamdardan asyp tústi.
– Biz Aral teńizine jiberiletin sý kólemin ulǵaittyq. Biyl Soltústik Aralǵa shamamen 2 milliard tekshe metr sý baǵyttaldy, al teńizdegi sý kólemi 22 milliard tekshe metrge jetti. Sońǵy jyldary Soltústik Araldaǵy sý kólemi azaiyp kele jatqanymen, 2024 jyldyń basynan bastap ol qaitadan óse bastady. Qazaqstan, Qyrǵyzstan, Tájikstan, Túrikmenstan jáne Ózbekstan qatysatyn Ortalyq Aziianyń Memleketaralyq úilestirý sý sharýashylyǵy komissiiasynyń aldaǵy otyrysynda Naryn-Syrdariia kaskadyndaǵy sý qoimalarynyń jumys kestesi men kelesi jyldyń sýǵarý maýsymyna arnalǵan boljamdy sý jetkizý kólemderi bekitiletin bolady, – dep habarlady vedomstvo ókili.
