قىركۇيەك ايىنىڭ ورتاسىندا ەلىمىزدە ەگىندى سۋعارۋ ماۋسىمى اياقتالادى. بيىل قۇرعاقشىلىققا قاتىستى بولجامدارعا قاراماستان، ق ر سۋ رەسۋرستارى جانە يرريگاسيا مينيسترلىگى توتەنشە جاعدايلاردىڭ، سۋعارۋ سۋىنىڭ تاپشىلىعىنىڭ الدىن الۋعا، وتكەن جىلدىڭ تاجىريبەسىنەن ساباق الۋعا جانە اگرارشىلاردى ۇزدىكسىز سۋعارۋ سۋمەن قامتاماسىز ەتۋگە قول جەتكىزگەن.
سۋعارۋ ماۋسىمى بارىسىندا اگرارشىلارعا شامامەن 11 ميلليارد تەكشە مەتر سۋدى پايدالانعان. مينيسترلىككە قاراستى «قازسۋشار» ۇيىمىنىڭ فيليالدارى شارۋا قوجالىقتارىمەن سۋعارۋ سۋىن جەتكىزۋ بويىنشا شامامەن 25 مىڭ كەلىسىمشارت جاساسقانى ءمالىم بولدى.
ەڭ كوپ سۋ العان وڭىرلەر – قىزىلوردا وبلىسى (شامامەن 3،5 ميلليارد تەكشە مەتر)، تۇركىستان وبلىسى (شامامەن 3،2 ميلليارد تەكشە مەتر)، جەتىسۋ وبلىسى (1،2 ميلليارد تەكشە مەتردەن استام)، جانە جامبىل وبلىسى (1 ميلليارد تەكشە مەتر) قۇراپ وتىر.
– ەلىمىزدە سۋعارۋ كەزەڭىندە جوسپارلانعان جۇمىستار نەگىزىنەن ءۇش باعىت بويىنشا ءجۇردى. ءبىرىنشىسى كەڭزەڭدە – سۋ قويمالارىن تولتىرۋ. كوپ جىلدار بويى، ءتىپتى كەيدە تاريحتا العاش رەت، سۋ تاسقىنى كەزىندە سۋ قويمالارى 100% تولتىرىلدى.
ەكىنشىسى – «سۋ ديپلوماتياسى»، ياعني ەلىمىزدىڭ گەوگرافيالىق ورنالاسۋىنا بايلانىستى اسىرەسە وڭتۇستىك وڭىرلەر ءۇشىن ماڭىزدى كورشى ەلدەرمەن كەلىسسوزدەر مەن مامىلەلەر جاساۋ. ءۇشىنشىسى – گيدروتەحنيكالىق قۇرىلعىلاردى دايىنداۋ: جوندەۋ جۇمىستارى، قايتا قۇرۋ، ارنالاردى تازالاۋ، يرريگاسيالىق جەلىلەردى دايىنداۋ جانە باسقا دا ۇيىمداستىرۋشىلىق ماسەلەلەر، – دەيدى سۋ رەسۋرستارى جانە يرريگاسيا مينيسترلىگىنىڭ رەسمي وكىلى ءمولدىر ابدۋالييەۆا.
ءبىرىنشى باعىت بويىنشا سۋ تاسقىنى كەزىندە ەلدەگى سۋ قويمالارىنا 75 ميلليارد تەكشە مەتر سۋ جينالعان. بۇل وتكەن جىلمەن سالىستىرعاندا 15 ميلليارد تەكشە مەترگە ارتىق. جينالعان سۋدىڭ 12 ميلليارد تەكشە مەتردەن استامى – تاسقىن سۋى. بۇگىنگى تاڭدا قازاقستاننىڭ سولتۇستىك، ورتالىق، شىعىس جانە باتىس وڭىرلەرىندەگى سۋ قويمالارى 80%-عا تولتىرىلعان.
ماۋسىم كەزىندە مينيسترلىك قىزمەتكەرلەرى 100-دەن استام گيدروپوستتى جوندەپ، قايتا قالپىنا كەلتىرگەن. سونىمەن قاتار 700 شاقىرىمنان استام كانالداردى تازارتتى، 1000-نان استام گيدروتەحنيكالىق قۇرىلعىلارعا اتتەستاسيا جۇرگىزىپتى. سونىمەن قاتار 11 وڭىردە 98 گيدروتەحنيكالىق قۇرىلعى جوندەلدى.
ال «سۋ ديپلوماتياسى» باعىتى بويىنشا كورشى ەلدەرمەن بىرلەسكەن جۇمىستىڭ ارقاسىندا مينيسترلىك قازاقستاننىڭ وڭتۇستىك وڭىرلەرىن قاجەتتى كولەمدەگى سۋمەن قامتاماسىز ەتتى. بيىل سۋعارۋ ماۋسىمىندا كورشى ەلدەردەن كەلگەن سۋ كولەمى باستاپقى بولجامداردان اسىپ ءتۇستى.
– ءبىز ارال تەڭىزىنە جىبەرىلەتىن سۋ كولەمىن ۇلعايتتىق. بيىل سولتۇستىك ارالعا شامامەن 2 ميلليارد تەكشە مەتر سۋ باعىتتالدى، ال تەڭىزدەگى سۋ كولەمى 22 ميلليارد تەكشە مەترگە جەتتى. سوڭعى جىلدارى سولتۇستىك ارالداعى سۋ كولەمى ازايىپ كەلە جاتقانىمەن، 2024 جىلدىڭ باسىنان باستاپ ول قايتادان وسە باستادى. قازاقستان، قىرعىزستان، تاجىكستان، تۇرىكمەنستان جانە وزبەكستان قاتىساتىن ورتالىق ازيانىڭ مەملەكەتارالىق ۇيلەستىرۋ سۋ شارۋاشىلىعى كوميسسياسىنىڭ الداعى وتىرىسىندا نارىن-سىرداريا كاسكادىنداعى سۋ قويمالارىنىڭ جۇمىس كەستەسى مەن كەلەسى جىلدىڭ سۋعارۋ ماۋسىمىنا ارنالعان بولجامدى سۋ جەتكىزۋ كولەمدەرى بەكىتىلەتىن بولادى، – دەپ حابارلادى ۆەدومستۆو وكىلى.
