Fýtboldan Qazaqstan ulttyq quramasynyń bas bapkeri Stanıslav Cherchesov qyzmetinen ketti, dep habarlaıdy Dalanews.kz.
Bul týraly QFF baspasóz qyzmeti habarlady.
Eńbek sharty eki jaqtyń ózara kelisimi boıynsha toqtatyldy.
Stanıslav Cherchesov Qazaqstan quramasynyń tizginin 2024 jyldyń maýsymynda ustady. Onyń jetekshiligimen ulttyq qurama ÝEFA Ulttar lıgasynda 6 mach ótkizip, Norvegıa quramasymen teń oınap, 1 upaı jınady.
Sondaı-aq Qazaqstan quramasynan jattyqtyrýshylar shtaby tolyq qurammen ketti.
"Qazaqstan fýtbol federasıasy Stanıslav Salamuly men onyń shtabyna atqarǵan jumysy úshin alǵys aıtyp, mansabyna tabys tileıdi!", delingen habarlamada.
Fýtboldan ulttyq quramanyń bas bapkeri qyzmetine úmitkerler tizimi qarastyrylyp jatyr.
Aıta keteıik, buǵan deıin Cherchesov kópshiliktiń synyna ilikken edi. Ulttar lıgasy aıasynda Slovenıamen ótken machtan keıingi baspasóz konferensıasynda marqum Amangeldi Seıithannyń uly Begasyl Seıithan Stanıslav Cherchesovke qazaq tilinde suraq qoıady. Bas bapker jýrnalısiń ústine Fransıanyń PSJ klýbynyń jeıdesin kıip alǵanyn ázilge aınaldyrǵysy keldi me, áıteýir: "Sen qaı tilde sóılep tursyń – fransýzsha ma?" dep sózin bóldi. Sonan soń basyn ızep, suraǵyn jalǵastyrýǵa bolatynyn ańǵartty.
Odan keıin kópshilik Stanıslav Cherchesovtiń munysyn qazaq tilin kemsitýge balap, áleýmettik jelide osy suqbattyń vıdeosyn jappaı bólise bastady. Týrızm jáne sport mınıstrligi bul jaǵdaıǵa beı-jaı qaramaı, Qazaqstan fýtbol federasıasyna resmı hat joldady. Kóp uzamaı Cherchesovke aıyppul salynǵany belgili boldy. Parlamentte bul jaıly Qazaqstan fýtbol federasıasynyń prezıdenti Ádilet Bármenqulov málim etti. Týrızm jáne sport mınıstri osy jaǵdaılardan soń eldi sabyrǵa shaqyryp, jelide jazba jarıalady.
