فۋتبولدان قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆ قىزمەتىنەن كەتتى، دەپ حابارلايدى Dalanews.kz. 

بۇل تۋرالى قفف باسپا ءسوز قىزمەتى حابارلادى.

ەڭبەك شارتى ەكى جاقتىڭ ءوزارا كەلىسىمى بويىنشا توقتاتىلدى.

ستانيسلاۆ چەرچەسوۆ قازاقستان قۇراماسىنىڭ تىزگىنىن 2024 جىلدىڭ ماۋسىمىندا ۇستادى. ونىڭ جەتەكشىلىگىمەن ۇلتتىق قۇراما ۋەفا ۇلتتار ليگاسىندا 6 ماچ وتكىزىپ، نورۆەگيا قۇراماسىمەن تەڭ ويناپ، 1 ۇپاي جينادى.

سونداي-اق قازاقستان قۇراماسىنان جاتتىقتىرۋشىلار شتابى تولىق قۇراممەن كەتتى.

"قازاقستان فۋتبول فەدەراسياسى ستانيسلاۆ سالام ۇلى مەن ونىڭ شتابىنا اتقارعان جۇمىسى ءۇشىن العىس ايتىپ، مانسابىنا تابىس تىلەيدى!"، دەلىنگەن حابارلامادا.

فۋتبولدان ۇلتتىق قۇرامانىڭ باس باپكەرى قىزمەتىنە ۇمىتكەرلەر ءتىزىمى قاراستىرىلىپ جاتىر.

ايتا كەتەيىك، بۇعان دەيىن چەرچەسوۆ كوپشىلىكتىڭ سىنىنا ىلىككەن ەدى. ۇلتتار ليگاسى اياسىندا سلوۆەنيامەن وتكەن ماچتان كەيىنگى باسپا ءسوز كونفەرەنسياسىندا مارقۇم امانگەلدى سەيىتحاننىڭ ۇلى بەگاسىل سەيىتحان ستانيسلاۆ چەرچەسوۆكە قازاق تىلىندە سۇراق قويادى. باس باپكەر ءجۋرناليستىڭ ۇستىنە فرانسيانىڭ پسج كلۋبىنىڭ جەيدەسىن كيىپ العانىن ازىلگە اينالدىرعىسى كەلدى مە، ايتەۋىر: "سەن قاي تىلدە سويلەپ تۇرسىڭ – فرانسۋزشا ما؟" دەپ ءسوزىن ءبولدى. سونان سوڭ باسىن يزەپ، سۇراعىن جالعاستىرۋعا بولاتىنىن اڭعارتتى.

ودان كەيىن كوپشىلىك ستانيسلاۆ چەرچەسوۆتىڭ مۇنىسىن قازاق ءتىلىن كەمسىتۋگە بالاپ، الەۋمەتتىك جەلىدە وسى سۇقباتتىڭ ۆيدەوسىن جاپپاي بولىسە باستادى. تۋريزم جانە سپورت مينيسترلىگى بۇل جاعدايعا بەي-جاي قاراماي، قازاقستان فۋتبول فەدەراسياسىنا رەسمي حات جولدادى. كوپ ۇزاماي چەرچەسوۆكە ايىپپۇل سالىنعانى بەلگىلى بولدى. پارلامەنتتە بۇل جايلى قازاقستان فۋتبول فەدەراسياسىنىڭ پرەزيدەنتى ادىلەت بارمەنقۇلوۆ ءمالىم ەتتى. تۋريزم جانە سپورت ءمينيسترى وسى جاعدايلاردان سوڭ ەلدى سابىرعا شاقىرىپ، جەلىدە جازبا جاريالادى.