Soltústik Qazaqstanda "Taza Qazaqstan" respýblikalyq ekologiialyq aktsiiasy aiasynda kógaldandyrý, aýmaqtardy tazartý júrgizilip, halyqpen túsindirý kezdesýleri ótýde, dep habarlaidy Dalanews.kz
SQO ákiminiń tapsyrmasyna sáikes úsh ailyq abattandyrý ailyǵy jariialandy. Petropavlda oblys ákiminiń birinshi orynbasary Marat Tasmaǵanbetov, oblys ákiminiń orynbasary Qanat Dúzelbaev, oblystyq máslihat tóraǵasy Vladimir Býbenko, qala ákimi Serik Muhamediev, Qyzyljar aýdanynyń ákimi Saqtaǵan Sádvokasov, sondai-aq merdiger uiymdar, qoǵam belsendileri, memlekettik organdar men qala turǵyndarynyń qatysýymen jiyn ótti. Kezdesýde aýmaqtardy abattandyrý men «jasyl aimaqtardy» qalyptastyrý jónindegi keshendi jospardyń júzege asyrylý máseleleri talqylandy.
«Azamattardyń ekologiialyq mádenieti qalyptasyp keledi. Tabiǵatqa uqypty qaraý – búgingi ómirimizdiń mańyzdy bóligi. Osyǵan bailanysty oblys ákimi Petropavl jáne Qyzyljar aýdandary boiynsha keńes ótkizýdi tapsyrdy. Qolaily aýa raiy jaǵdaiy abattandyrý jumystaryn jandandyrýǵa múmkindik berip otyr. Mundai keńester oblystyń barlyq aýdandarynda ótedi», – dedi Marat Tasmaǵanbetov.
«Taza Qazaqstan» aiasynda byltyr 7,6 mlrd teńgege abattandyrý jumystary júrgizildi. 36 balalar oiyn alańy men 40 sport alańy ornatyldy.
«Ótken jyldyń qarasha aiynda "Eń úzdik aýmaqty abattandyrý" baiqaýy ótti. 4 nominatsiia boiynsha 4 jeńimpaz anyqtaldy. Jeńimpazdarǵa balalar alańdaryn ornatýǵa qarajat bólindi. Biyl da bul baiqaý jalǵasady. Nominatsiialar sanyn kóbeitýdi josparlap otyrmyz», – dedi Qanat Dúzelbaev.
Abattandyrýǵa arnalǵan úsh ailyq kezeń bastalǵaly oblys aýmaǵynda 5 myń aýla tazartyldy. 130 tarihi-mádeni eskertkish pen 90 saiabaq pen skver sanitarlyq talaptarǵa sáikestendirildi. Poligondarǵa 10 myń tonnaǵa jýyq qoqys shyǵaryldy. Ótken jylǵy sý tasqynynan zardap shekken aýmaqtarda 2 myńnan astam aǵash otyrǵyzý, 70-ten astam skverdi abattandyrý josparlanýda.
Degenmen, problemalar da bar. Mysaly, keibir merdigerler óz mindetterine jaýapsyz qaraýy. Kóbinese qurylys jáne jóndeýden keiin kósheler men aýmaqtarda qoqys qalyp qoiady. Marat Tasmaǵanbetov merdigerlerge kemshilikterdi shuǵyl túrde joiyp, búlingen trotýarlar men joldy qalpyna keltirýdi, bordiýrlerdi aýystyryp, qoqysty shyǵarý kerektigin basa aitty.
