S&P Global Ratings Qazaqstannyń uzaq merzimdi egemendi kredittik reitingin «BBB-» deńgeiinde rastady, boljam - «Pozitivti», dep habarlaidy Dalanews.kz.
Pozitivti boljam S&P agenttiginiń aldaǵy jyldary fiskaldyq konsolidatsiia jalǵasady degen kútilimin, sondai-aq memlekettiń eleýli kólemdegi ótimdi aktivterin saqtap qalýyn kórsetedi. S&P baǵalaýynsha, jańa orta merzimdi biýdjet biýdjet tapshylyǵyn kezeń-kezeńimen qysqartýdy jáne Ulttyq qor aktivterin qaita jinaqtaýdy kózdeidi.
S&P 2025 jyly Ulttyq qordyń investitsiialyq nátijeleri joǵary bolǵanyn atap ótti. Sonymen qatar, Ulttyq qor qarajatyn paidalaný erejeleriniń qatańdaýy ótimdi aktivterdiń aitarlyqtai kólemin saqtaýǵa múmkindik beredi. 2025 jyldyń sońyndaǵy jaǵdai boiynsha Ulttyq qordyń valiýtalyq aktivteri shamamen 63,9 mlrd AQSh dollaryn quraǵan.
2026–2028 jyldary S&P ekonomikalyq ósim qarqynynyń birshama baiaýlaýyn boljap otyr, alaida ol orta merzimdi perspektivada shamamen 4% deńgeiinde turaqty saqtalady dep kútiledi. Bul fiskaldyq yntalandyrýdyń qysqarýyna jáne 2026 jyly munai óndirý kóleminiń tómendeýine bailanysty.
S&P pikirinshe, aqsha-nesie saiasatynyń negizderi barǵan saiyn tiimdi bola túsýde. Agenttik sarapshylary 2025 jyldyń sońynda infliatsiianyń baiaýlaǵanyn atap ótip, 2028–2029 jyldary Ulttyq banktiń júrgizip otyrǵan aqsha-nesie saiasaty men biýdjet tapshylyǵynyń qysqarýy nátijesinde infliatsiia odan ári tómendeidi dep kútedi.
Sondai-aq S&P Úkimet pen Qazaqstan Ulttyq banki arasyndaǵy aqsha-nesie saiasatyn, makroprýdentsiialyq jáne fiskaldyq quraldardy iske asyrý máseleleri boiynsha úilestirýdiń kúsheigenin erekshe atap ótti.
Eske salaiyq, 2025 jylǵy tamyzda S&P Global Ratings Qazaqstan Respýblikasynyń egemendi kredittik reitingteri boiynsha boljamdy «Turaqty» deńgeiden «Pozitivti» deńgeige qaita qarap, uzaq merzimdi jáne qysqa merzimdi reitingterdi «BBB-/A-3» deńgeiinde rastaǵan bolatyn.
Sonymen birge agenttik munai kiristeriniń kúrt ári uzaq merzimdi tómendeýi jaǵdaiynda, onyń ishinde Kaspii qubyr konsortsiýmy (KQK) qubyry uzaq ýaqytqa isten shyqsa, egemendi reitingter boiynsha boljam qaita qaralýy nemese tipti tómendetilýi múmkin ekenin de habarlaǵan.
