Taldyqorǵanda Sherzat Bolattyń ólimine qatysty ótip jatqan sot protsesinde 21 mamyr kúni onyń máiiti túsirilgen foto kórsetildi, dep habarlaidy Dalanews.kz.
Sol kúni sotta bul iske qatysty basty aiyptalýshy Abzal Shynasyldan jaýap alyndy.
Jábirlenýshi taraptyń advokaty Meiirman Shekeev sot otyrysynda Abzal Shynasyldan marqum Sherzattyń dene jaraqattaryna qatysty suraq qoidy. Buǵan deiin sotta Sherzattyń anasy Gúlbara Bishembieva balasynyń betinde jáne denesinde jaraqat bolǵanyn aitqan edi.
"Myna dene jaraqatyna qatysty ne aita alasyz?", – dep surady advokat.
Alaida aiyptalýshy Abzal Shynasyl bul suraqqa qysqa ǵana jaýap qaiyrdy:
"Bilmeimin. Sherzatqa qolym tigen joq. Sherzatty men urǵan joqpyn", – dedi ol.
Sýrette Sherzattyń betinde jáne denesinde jaraqattar bar.
Eske salaiyq, buǵan deiin Abzal taǵylǵan aiypty jartylai moiyndaitynyn aitty.
Aiyptalýshy Abzal Shynasyldyń aitýynsha, oqiǵa bolǵan kúni ol dostary – Azamat Toqtaýbaev, Shyńǵys Belgojaev, Ravil Sakiev jáne kámelet jasqa tolmaǵan D.Y.-men birge kafede demalyp otyrǵan. Sol kezde oǵan Nurbol Toqtaýbaev qońyraý shalyp, "Qamajai" dúkeni mańynda dosyn bireýler soqqyǵa jyqqanyn habarlaǵan.
Abzaldyń sózinshe, ol oqiǵa ornyna kelgende, tóbeles bastalyp ketken eken. Ol sondai-aq Sherzattyń aǵasy – Nurǵanat Ǵaiypbaevtyń ózine qarai myltyqpen oq atqanyn aitty.
«Sodan keiin olar Sherzatpen birge Shota Rýstaveli kóshesimen qashyp ketti. Keiin Sherzat qulap tústi. Ol qulaǵan kezde men ony uryp, teptim. Sosyn men Nurǵanatty úsh ret pyshaqtadym. Muny moiyndaimyn», – dedi Abzal Shynasyl.
Sot barysynda Abzaldan ne úshin pyshaqty ózimen birge alyp júrgeni suralǵanda, ol oqiǵadan úsh kún buryn janarmai beketinde belgisiz úsh adam shabýyl jasaǵanyn, sol sebepti ózimen birge pyshaq alyp júrgenin aitqan.
Alaida sotta Abzal Shynasyl burynǵy aitqan sózderinen bas tartty. Onyń aitýynsha, Sherzatty óltirgen ol emes jáne pyshaqty kim qoldanǵanyn bilmeidi.
