تالدىقورعاندا شەرزات بولاتتىڭ ولىمىنە قاتىستى ءوتىپ جاتقان سوت پروسەسىندە 21 مامىر كۇنى ونىڭ ءمايىتى تۇسىرىلگەن فوتو كورسەتىلدى، دەپ حابارلايدى Dalanews.kz.
سول كۇنى سوتتا بۇل ىسكە قاتىستى باستى ايىپتالۋشى ابزال شىناسىلدان جاۋاپ الىندى.
جابىرلەنۋشى تاراپتىڭ ادۆوكاتى مەيىرمان شەكەيەۆ سوت وتىرىسىندا ابزال شىناسىلدان مارقۇم شەرزاتتىڭ دەنە جاراقاتتارىنا قاتىستى سۇراق قويدى. بۇعان دەيىن سوتتا شەرزاتتىڭ اناسى گۇلبارا بيشەمبييەۆا بالاسىنىڭ بەتىندە جانە دەنەسىندە جاراقات بولعانىن ايتقان ەدى.
"مىنا دەنە جاراقاتىنا قاتىستى نە ايتا الاسىز؟"، – دەپ سۇرادى ادۆوكات.
الايدا ايىپتالۋشى ابزال شىناسىل بۇل سۇراققا قىسقا عانا جاۋاپ قايىردى:
"بىلمەيمىن. شەرزاتقا قولىم تيگەن جوق. شەرزاتتى مەن ۇرعان جوقپىن"، – دەدى ول.
سۋرەتتە شەرزاتتىڭ بەتىندە جانە دەنەسىندە جاراقاتتار بار.
ەسكە سالايىق، بۇعان دەيىن ابزال تاعىلعان ايىپتى جارتىلاي مويىندايتىنىن ايتتى.
ايىپتالۋشى ابزال شىناسىلدىڭ ايتۋىنشا، وقيعا بولعان كۇنى ول دوستارى – ازامات توقتاۋبايەۆ، شىڭعىس بەلگوجايەۆ، راۆيل ساكييەۆ جانە كامەلەت جاسقا تولماعان د.ى.-مەن بىرگە كافەدە دەمالىپ وتىرعان. سول كەزدە وعان نۇربول توقتاۋبايەۆ قوڭىراۋ شالىپ، "قاماجاي" دۇكەنى ماڭىندا دوسىن بىرەۋلەر سوققىعا جىققانىن حابارلاعان.
ابزالدىڭ سوزىنشە، ول وقيعا ورنىنا كەلگەندە، توبەلەس باستالىپ كەتكەن ەكەن. ول سونداي-اق شەرزاتتىڭ اعاسى – نۇرعانات عايىپبايەۆتىڭ وزىنە قاراي مىلتىقپەن وق اتقانىن ايتتى.
«سودان كەيىن ولار شەرزاتپەن بىرگە شوتا رۋستاۆەلي كوشەسىمەن قاشىپ كەتتى. كەيىن شەرزات قۇلاپ ءتۇستى. ول قۇلاعان كەزدە مەن ونى ۇرىپ، تەپتىم. سوسىن مەن نۇرعاناتتى ءۇش رەت پىشاقتادىم. مۇنى مويىندايمىن»، – دەدى ابزال شىناسىل.
سوت بارىسىندا ابزالدان نە ءۇشىن پىشاقتى وزىمەن بىرگە الىپ جۇرگەنى سۇرالعاندا، ول وقيعادان ءۇش كۇن بۇرىن جانارماي بەكەتىندە بەلگىسىز ءۇش ادام شابۋىل جاساعانىن، سول سەبەپتى وزىمەن بىرگە پىشاق الىپ جۇرگەنىن ايتقان.
الايدا سوتتا ابزال شىناسىل بۇرىنعى ايتقان سوزدەرىنەن باس تارتتى. ونىڭ ايتۋىنشا، شەرزاتتى ولتىرگەن ول ەمەس جانە پىشاقتى كىم قولدانعانىن بىلمەيدى.
