Túrkistan oblystyq Shámshi Qaldaiaqov atyndaǵy filarmoniianyń ánshisi Narkenje Serikbaeva mádeniet salasyndaǵy túitkilder men basshylyq tarapynan kórsetilgen qysym týraly áleýmettik jelide ashyq jazba jariialaǵan edi. Óner iesiniń bul málimdemesine filarmoniia direktory Ǵalymjan Ernazarov jaýap berdi, dep habarlaidy Dalanews.kz.
“Keshegi áleýmettik jelide tarap jatqan video boiynsha men de óz jaýabymdy bergim keledi. Men – otbasyly, anam bar azamatpyn. Maǵan, meniń otbasyma qatty kúie jaǵylyp jatyr. Bul zań meni de qorǵaidy degen oiym bar. Zań aiasynda sotqa shaǵymdandym. Sottyń sheshimin kúteiik. Sodan keiin barlyq áleýmettik jelide jariialaimyz”, — dedi Ǵalymjan Ernazarov.
Sonymen qatar ol ánshiniń “jumystan qýdalaý” týraly málimdemesin joqqa shyǵardy.
“Meni jumystan qýdalap jatyr” degen sózderi shyndyqqa janaspaidy. Sebebi onyń áleýmettik paraqshasynan kórip otyrsyzdar, bir kúni Jezqazǵanda, bir kúni Qyzylordada toida júredi. Ol múldem jumysqa kelmeidi. Bizdiń kemshiligimiz – jumysta bolmady dep jumystan shyǵaryp jiberýimiz edi. Biz oǵan janashyrlyq tanyttyq”, – deidi ol.
Direktordyń aitýynsha, Serikbaeva onyń kásibi biliktiligine de kúmán keltirgen. Buǵan qatysty Ernazarov óz qyzmetine tolyq sáikes keletin bilimi bar ekenin atap ótti.
“Mamandyǵym sáikes kelip, ónerge janashyr bolǵannan keiin men osy qyzmetti atqaryp otyrmyn. Shetelge barý boiynsha – olardyń barlyǵy resmi is-sharalar, elshiniń haty, basqarmanyń ruqsaty bar. Bul aqshany dalaǵa shashyp-tógý emes. Astana kúnin toilaý maqsatynda bara jatqan sapar”, – dedi ol.
Aita keteiik, buǵan deiin ánshi Narkenje Serikpaeva ashyq málimde jasaǵan edi.
"Men bosqa shyryldap, haip izdep júrgen ánshi emespin. Ónerge janym ashyǵandyqtan ashynyp aitamyn. Shyndyq dep shyryldap júrgen qazaqtyń bir qyzymyn", – dedi Serikpaeva.
Ol ózi qyzmet etetin filarmoniiany "qara shańyraq" dep atady. Aitýynsha, aldaǵy shilde aiynyń 11-inde filarmoniia ujymy Ispaniiaǵa kontserttik baǵdarlamamen barýy tiis. Alaida shetelge shyǵar aldynda kiim máselesin kótergeni úshin qysymǵa ushyraǵanyn málim etti.
"Sol jaqqa bararda kiim máselesin rettep berińiz degen sózim basshyǵa jaqpai, qysym kórsetip jatyr", – dedi ol.
Ánshiniń aitýynsha, filarmoniia direktory Ǵalymjan esimdi azamat oǵan kontsertke qatyspaisyń dep talap qoiǵan.
"Búgin basshymyz Ǵalymjan myrza maǵan filarmoniia kontsertine shyqpaisyń dep talap qoiyp otyr. Nege? Ne úshin? Jeke kesh berip, el aralap júrgen men shyqpaǵanda kim shyǵady?" – dep ashyna surady ol.
Narkenjeniń aitýynsha, filarmoniia basshylyǵy ónerpazdardyń shetelge laiyqty ulttyq kiimmen shyǵýyn qamtamasyz etýge mindetti.
"Dimashty álem tanydy. Dombyrasymen, qazaqsha kiimimen. Álem qazaq ónerine kóz tigip otyrǵan sátte, prokattan alynǵan, jamaý-jamaý kiimmen emes, uialmai kiip shyǵatyn, qazaqtyń bolmysyn kórsetetin kiim tigý kerek emes pe?" – dedi ol.
Ánshiniń sózine qaraǵanda, shetelge shyǵý úshin árbir ónerpazǵa shamamen 500 myń teńge qajet (jol aqysy, viza jáne t.b.). Ol bul somaǵa ár ánshige kemi eki kóilek tiktirýge bolatynyn aitady.
Serikpaeva filarmoniia basshysynyń ujymǵa dóreki sóileitinin de jasyrmady. Bul jaǵdai onyń jeke basynyń emes, jalpy ónerpazdardyń máselesi ekenin atap ótti.
"Ailyǵy shailyǵynan aspaityn, arasynda qashyp, tyǵylyp toiǵa shyǵyp qaitatyn ánshi kiimin tiktire me? Ánin jazdyra ma? Kreditin tólei me?" – dep kóptiń janaiqaiyn jetkizdi.
Ol osy máselege bailanysty Túrkistan oblysynyń ákimi Nuralhan Oralbaiulynan kómek surap, jeke qabyldaýyn ótindi.
"Meni qabyldasańyz, aitarym kóp. Bizdiń filarmoniianyń qazirgi jai-kúiinen habar alyńyz. Mádenietimizdi kimderdiń qolyna berip otyrǵanyńyzǵa mán berińizshi", – dep túiindedi ánshi.
Taǵy bir úndeýinde Narkenje Serikpaeva kóp qysym kórip kele jatqanyn aitady.
Maǵan “kontsertke qatyspaisyń, seniń kiimiń joq” dep jáne mahabbattar jaily áńgime aitty. Uiat ta bolsa aitaiyn, “meniń aldyma kelip otyr, men seni iiskeýim kerek” degen áńgimeniń bárinen ótip kele jatyrmyn. Qurmetti ákim myrza, osy máseleni qolǵa alýyńyzdy suraimyn. Jalpy men ǵana emes, qazaq qyzdarynyń kóbi sondai basshylardyń astynda ketip bara jatyr, deidi ánshi.
Bul jaitqa qatysty Túrkistan qalasynyń mádeniet basqarmasy pikir bildirdi.
"Shámshi Qaldaiaqov atyndaǵy oblystyq filarmoniia ánshisi, QR Eren eńbegi úshin medaliniń iegeri N.Serikbevanyń áleýmettik jelidegi syni jazbasyna sáikes kelesidei habarlaimyz. Ondaǵy kóterilgen máselelerdi anyqtaý maqsatynda basqarma tarapynan shuǵyl komissiia qurylyp, zerdeleý jumystaryn júrgizý boiynsha tapsyrma berildi. Komissiia jumysynyń nátijesinen soń resmi jaýap beriledi", - deidi basqarma ókilderi.
