تۇركىستان وبلىستىق ءشامشى قالداياقوۆ اتىنداعى فيلارمونيانىڭ ءانشىسى ناركەنجە سەرىكبايەۆا مادەنيەت سالاسىنداعى تۇيتكىلدەر مەن باسشىلىق تاراپىنان كورسەتىلگەن قىسىم تۋرالى الەۋمەتتىك جەلىدە اشىق جازبا جاريالاعان ەدى. ونەر يەسىنىڭ بۇل مالىمدەمەسىنە فيلارمونيا ديرەكتورى عالىمجان ەرنازاروۆ جاۋاپ بەردى، دەپ حابارلايدى Dalanews.kz.
“كەشەگى الەۋمەتتىك جەلىدە تاراپ جاتقان ۆيدەو بويىنشا مەن دە ءوز جاۋابىمدى بەرگىم كەلەدى. مەن – وتباسىلى، انام بار ازاماتپىن. ماعان، مەنىڭ وتباسىما قاتتى كۇيە جاعىلىپ جاتىر. بۇل زاڭ مەنى دە قورعايدى دەگەن ويىم بار. زاڭ اياسىندا سوتقا شاعىمداندىم. سوتتىڭ شەشىمىن كۇتەيىك. سودان كەيىن بارلىق الەۋمەتتىك جەلىدە جاريالايمىز”، — دەدى عالىمجان ەرنازاروۆ.
سونىمەن قاتار ول ءانشىنىڭ “جۇمىستان قۋدالاۋ” تۋرالى مالىمدەمەسىن جوققا شىعاردى.
“مەنى جۇمىستان قۋدالاپ جاتىر” دەگەن سوزدەرى شىندىققا جاناسپايدى. سەبەبى ونىڭ الەۋمەتتىك پاراقشاسىنان كورىپ وتىرسىزدار، ءبىر كۇنى جەزقازعاندا، ءبىر كۇنى قىزىلوردادا تويدا جۇرەدى. ول مۇلدەم جۇمىسقا كەلمەيدى. ءبىزدىڭ كەمشىلىگىمىز – جۇمىستا بولمادى دەپ جۇمىستان شىعارىپ جىبەرۋىمىز ەدى. ءبىز وعان جاناشىرلىق تانىتتىق”، – دەيدى ول.
ديرەكتوردىڭ ايتۋىنشا، سەرىكبايەۆا ونىڭ كاسىبي بىلىكتىلىگىنە دە كۇمان كەلتىرگەن. بۇعان قاتىستى ەرنازاروۆ ءوز قىزمەتىنە تولىق سايكەس كەلەتىن ءبىلىمى بار ەكەنىن اتاپ ءوتتى.
“ماماندىعىم سايكەس كەلىپ، ونەرگە جاناشىر بولعاننان كەيىن مەن وسى قىزمەتتى اتقارىپ وتىرمىن. شەتەلگە بارۋ بويىنشا – ولاردىڭ بارلىعى رەسمي ءىس-شارالار، ەلشىنىڭ حاتى، باسقارمانىڭ رۇقساتى بار. بۇل اقشانى دالاعا شاشىپ-توگۋ ەمەس. استانا كۇنىن تويلاۋ ماقساتىندا بارا جاتقان ساپار”، – دەدى ول.
ايتا كەتەيىك، بۇعان دەيىن ءانشى ناركەنجە سەرىكپايەۆا اشىق مالىمدە جاساعان ەدى.
"مەن بوسقا شىرىلداپ، حايپ ىزدەپ جۇرگەن ءانشى ەمەسپىن. ونەرگە جانىم اشىعاندىقتان اشىنىپ ايتامىن. شىندىق دەپ شىرىلداپ جۇرگەن قازاقتىڭ ءبىر قىزىمىن"، – دەدى سەرىكپايەۆا.
ول ءوزى قىزمەت ەتەتىن فيلارمونيانى "قارا شاڭىراق" دەپ اتادى. ايتۋىنشا، الداعى شىلدە ايىنىڭ 11-ىندە فيلارمونيا ۇجىمى يسپانياعا كونسەرتتىك باعدارلامامەن بارۋى ءتيىس. الايدا شەتەلگە شىعار الدىندا كيىم ماسەلەسىن كوتەرگەنى ءۇشىن قىسىمعا ۇشىراعانىن ءمالىم ەتتى.
"سول جاققا باراردا كيىم ماسەلەسىن رەتتەپ بەرىڭىز دەگەن ءسوزىم باسشىعا جاقپاي، قىسىم كورسەتىپ جاتىر"، – دەدى ول.
ءانشىنىڭ ايتۋىنشا، فيلارمونيا ديرەكتورى عالىمجان ەسىمدى ازامات وعان كونسەرتكە قاتىسپايسىڭ دەپ تالاپ قويعان.
"بۇگىن باسشىمىز عالىمجان مىرزا ماعان فيلارمونيا كونسەرتىنە شىقپايسىڭ دەپ تالاپ قويىپ وتىر. نەگە؟ نە ءۇشىن؟ جەكە كەش بەرىپ، ەل ارالاپ جۇرگەن مەن شىقپاعاندا كىم شىعادى؟" – دەپ اشىنا سۇرادى ول.
ناركەنجەنىڭ ايتۋىنشا، فيلارمونيا باسشىلىعى ونەرپازداردىڭ شەتەلگە لايىقتى ۇلتتىق كيىممەن شىعۋىن قامتاماسىز ەتۋگە مىندەتتى.
"ديماشتى الەم تانىدى. دومبىراسىمەن، قازاقشا كيىمىمەن. الەم قازاق ونەرىنە كوز تىگىپ وتىرعان ساتتە، پروكاتتان الىنعان، جاماۋ-جاماۋ كيىممەن ەمەس، ۇيالماي كيىپ شىعاتىن، قازاقتىڭ بولمىسىن كورسەتەتىن كيىم تىگۋ كەرەك ەمەس پە؟" – دەدى ول.
ءانشىنىڭ سوزىنە قاراعاندا، شەتەلگە شىعۋ ءۇشىن ءاربىر ونەرپازعا شامامەن 500 مىڭ تەڭگە قاجەت (جول اقىسى، ۆيزا جانە ت.ب.). ول بۇل سوماعا ءار انشىگە كەمى ەكى كويلەك تىكتىرۋگە بولاتىنىن ايتادى.
سەرىكپايەۆا فيلارمونيا باسشىسىنىڭ ۇجىمعا دورەكى سويلەيتىنىن دە جاسىرمادى. بۇل جاعداي ونىڭ جەكە باسىنىڭ ەمەس، جالپى ونەرپازداردىڭ ماسەلەسى ەكەنىن اتاپ ءوتتى.
"ايلىعى شايلىعىنان اسپايتىن، اراسىندا قاشىپ، تىعىلىپ تويعا شىعىپ قايتاتىن ءانشى كيىمىن تىكتىرە مە؟ ءانىن جازدىرا ما؟ كرەديتىن تولەي مە؟" – دەپ كوپتىڭ جانايقايىن جەتكىزدى.
ول وسى ماسەلەگە بايلانىستى تۇركىستان وبلىسىنىڭ اكىمى نۇرالحان ورالبايۇلىنان كومەك سۇراپ، جەكە قابىلداۋىن ءوتىندى.
"مەنى قابىلداساڭىز، ايتارىم كوپ. ءبىزدىڭ فيلارمونيانىڭ قازىرگى جاي-كۇيىنەن حابار الىڭىز. مادەنيەتىمىزدى كىمدەردىڭ قولىنا بەرىپ وتىرعانىڭىزعا ءمان بەرىڭىزشى"، – دەپ تۇيىندەدى ءانشى.
تاعى ءبىر ۇندەۋىندە ناركەنجە سەرىكپايەۆا كوپ قىسىم كورىپ كەلە جاتقانىن ايتادى.
ماعان “كونسەرتكە قاتىسپايسىڭ، سەنىڭ كيىمىڭ جوق” دەپ جانە ماحابباتتار جايلى اڭگىمە ايتتى. ۇيات تا بولسا ايتايىن، “مەنىڭ الدىما كەلىپ وتىر، مەن سەنى يىسكەۋىم كەرەك” دەگەن اڭگىمەنىڭ بارىنەن ءوتىپ كەلە جاتىرمىن. قۇرمەتتى اكىم مىرزا، وسى ماسەلەنى قولعا الۋىڭىزدى سۇرايمىن. جالپى مەن عانا ەمەس، قازاق قىزدارىنىڭ كوبى سونداي باسشىلاردىڭ استىندا كەتىپ بارا جاتىر، دەيدى ءانشى.
بۇل جايتقا قاتىستى تۇركىستان قالاسىنىڭ مادەنيەت باسقارماسى پىكىر ءبىلدىردى.
"ءشامشى قالداياقوۆ اتىنداعى وبلىستىق فيلارمونيا ءانشىسى، ق ر ەرەن ەڭبەگى ءۇشىن مەدالىنىڭ يەگەرى ن.سەرىكبيەۆانىڭ الەۋمەتتىك جەلىدەگى سىني جازباسىنا سايكەس كەلەسىدەي حابارلايمىز. ونداعى كوتەرىلگەن ماسەلەلەردى انىقتاۋ ماقساتىندا باسقارما تاراپىنان شۇعىل كوميسسيا قۇرىلىپ، زەردەلەۋ جۇمىستارىن جۇرگىزۋ بويىنشا تاپسىرما بەرىلدى. كوميسسيا جۇمىسىنىڭ ناتيجەسىنەن سوڭ رەسمي جاۋاپ بەرىلەدى"، - دەيدى باسقارما وكىلدەرى.
