Qaraǵandy oblysynyń sport salasynda rezonans týdyrǵan oqiǵa tirkeldi. Aimaqtyń dene shynyqtyrý jáne sport basqarmasyn basqaratyn Olimpiada chempiony Serik Sápievke shabýyl jasalyp, ol túrli dene jaraqatyn alǵan degen aqparat tarady, dep habarlaidy Dalanews.kz.
Aldyn ala málimetterge sáikes, janjal 21 qańtar kúni keshke Qaraǵandy qalasyndaǵy Buqar jyraý dańǵyly mańynda bolǵan.
Tergeý nusqasyna sai, oqiǵaǵa qatysy bar negizgi kúdikti retinde basqarma basshysynyń orynbasary Dáýren Esimhanov kórsetilip otyr.
Aita keteiik, Serik Sápiev – Qazaqstanǵa tanymal sport qairatkeri, Olimpiada chempiony ári qazirgi tańda Qaraǵandy oblystyq dene shynyqtyrý jáne sport basqarmasynyń jetekshisi.
Al kúdikke ilingen Dáýren Esimhanov ta sport álemine beitanys tulǵa emes, ol sambodan Aziia jáne álem chempiony atanǵan.
Politsiianyń habarlaýynsha, atalǵan derek boiynsha «densaýlyqqa qasaqana ziian keltirý» baby negizinde qylmystyq is qozǵalǵan.
Qazirgi tańda jábirlenýshiniń alǵan jaraqatynyń deńgeiin anyqtaý úshin sot-meditsinalyq saraptama taǵaiyndalǵan.
Qaqtyǵysqa ne sebep bolǵany ázirge belgisiz. Quqyq qorǵaý organdary oqiǵanyń barlyq mán-jaiyn anyqtaý maqsatynda tergeý amaldaryn jalǵastyryp jatyr.
