قاراعاندى وبلىسىنىڭ سپورت سالاسىندا رەزونانس تۋدىرعان وقيعا تىركەلدى. ايماقتىڭ دەنە شىنىقتىرۋ جانە سپورت باسقارماسىن باسقاراتىن وليمپيادا چەمپيونى سەرىك ساپييەۆكە شابۋىل جاسالىپ، ول ءتۇرلى دەنە جاراقاتىن العان دەگەن اقپارات تارادى، دەپ حابارلايدى Dalanews.kz.
الدىن الا مالىمەتتەرگە سايكەس، جانجال 21 قاڭتار كۇنى كەشكە قاراعاندى قالاسىنداعى بۇقار جىراۋ داڭعىلى ماڭىندا بولعان.
تەرگەۋ نۇسقاسىنا ساي، وقيعاعا قاتىسى بار نەگىزگى كۇدىكتى رەتىندە باسقارما باسشىسىنىڭ ورىنباسارى داۋرەن ەسىمحانوۆ كورسەتىلىپ وتىر.
ايتا كەتەيىك، سەرىك ساپييەۆ – قازاقستانعا تانىمال سپورت قايراتكەرى، وليمپيادا چەمپيونى ءارى قازىرگى تاڭدا قاراعاندى وبلىستىق دەنە شىنىقتىرۋ جانە سپورت باسقارماسىنىڭ جەتەكشىسى.
ال كۇدىككە ىلىنگەن داۋرەن ەسىمحانوۆ تا سپورت الەمىنە بەيتانىس تۇلعا ەمەس، ول سامبودان ازيا جانە الەم چەمپيونى اتانعان.
پوليسيانىڭ حابارلاۋىنشا، اتالعان دەرەك بويىنشا «دەنساۋلىققا قاساقانا زيان كەلتىرۋ» بابى نەگىزىندە قىلمىستىق ءىس قوزعالعان.
قازىرگى تاڭدا جابىرلەنۋشىنىڭ العان جاراقاتىنىڭ دەڭگەيىن انىقتاۋ ءۇشىن سوت-مەديسينالىق ساراپتاما تاعايىندالعان.
قاقتىعىسقا نە سەبەپ بولعانى ازىرگە بەلگىسىز. قۇقىق قورعاۋ ورگاندارى وقيعانىڭ بارلىق ءمان-جايىن انىقتاۋ ماقساتىندا تەرگەۋ امالدارىن جالعاستىرىپ جاتىر.
