Jýrnalist Saia Manarbekqyzy “Shymbulaq” taý-shańǵy kýrortynyń baǵasy jyl saiyn qymbattap, qarapaiym qazaqstandyqtar úshin qoljetimsiz bolyp bara jatqanyn aitty, dep habarlaidy Dalanews.kz.
Onyń sózinshe, búginde “Shymbulaq” týristerge arnalǵandai áser qaldyrady. Jýrnalist baǵanyń ósýin qosylǵan qun salyǵynyń (QQS) ózgerýimen bailanystyrý qisynsyz ekenin alǵa tartty.
Aitýynsha, 2025 jyly aspaly jolmen joǵary kóterilý quny 10.800 teńge bolǵan, ol kezde QQS mólsherlemesi 12 paiyz edi. Al 2026 jyldan bastap QQS 16 paiyzǵa kóterilgenimen, baǵa 4 paiyzǵa emes, shamamen 25 paiyz ósken.
“Qazir eki kezekke bir adam úshin bilet quny 10 myń teńgege jetti. Eki adamǵa – 20 myń teńge. Bul baǵa mereke kúnderi 11 qańtarǵa deiin saqtaldy. 12 qańtardan bastap 8 myń teńgege tústi. Biraq bul baǵanyń ózi kóptegen qazaqstandyq úshin qoljetimsiz”, – dedi ol.
Manarbekqyzynyń sózinshe, kýrort aýmaǵynda tek shańǵy tebý emes, tamaqtaný quny da qymbat. Buǵan deiin ol áleýmettik jelilerde bir staqan shaidyń baǵasy 5 myń teńge ekeni týraly video taraǵanyn da eske saldy.
Osyǵan bailanysty jýrnalist qoǵamda eki túrli tarif engizý týraly usynystar aitylyp jatqanyn jetkizdi. Aitýynsha, birinshi tarif Qazaqstan azamattary úshin qoljetimdi bolýy kerek. Al ekinshisi, iaǵni týristerge arnalǵanyn qymbatyraq belgileýge bolady.
"Mundai tájiribe kóptegen elde bar. Biz shetelge barǵanda týrist retinde qymbat tóleimiz, oǵan qarsylyq bildirmeimiz. Biraq óz elimizde qarapaiym azamattardyń da demalyp, taza aýa jutyp, qoljetimdi baǵamen tamaqtanyp, múmkin bolsa, shańǵy tebýine jaǵdai jasalýy kerek”, – dedi ol.
Jýrnalist ailyq tabysy 100 myń teńge shamasyndaǵy adamdar, kópbalaly otbasylar nemese nesiesi bar azamattar úshin “Shymbulaqta” demalý múmkin emes ekenin atap ótti.
Sondai-aq ol Kókjailaý máselesine de toqtalyp, bul aimaqtyń halyq úshin qoljetimdi demalys orny bolyp qalýy mańyzdy ekenin aitty.
“Kókjailaý – adamdardyń tegin taýǵa shyǵyp, demalatyn jalǵyz oryndarynyń biri. Ol balalarǵa, qarttarǵa, otbasylarǵa arnalǵan demalys orny. Eger ol da kommertsiialyq jobaǵa ainalsa, qarapaiym halyq taǵy bir múmkindiginen aiyrylady”, – dedi Saia Manarbekqyzy.
Ol eki tariftik júie engizý máselesin talqylaýǵa shaqyryp, qoǵam pikiriniń mańyzdy ekenin atap ótti.
