Sherzat Bolattyń ólimine qatysty sot protsesinde jábirlenýshi taraptyń qorǵaýshysy Meiirman Shekeev sotqa kýágerlerdiń áreketine nazar aýdarýdy surady. Ol sotta Elmira Nurbekova men Dana Jaqsygeldiniń jaýaptaryna qatysty jeke qaýly shyǵaryp, isti Almaty oblysynyń prokýroryna joldaýdy talap etti, dep habarlaidy Dalanews.kz.
“Elmira Nurbekova sot protsesinde kórineý jalǵan aiǵaq bergeni jáne asa aýyr qylmysty jasyryp qalǵany úshin jaýapqa tartylýy tiis”, — dedi qorǵaýshy.
Onyń aitýynsha, beinebaqylaý jazbasyna súiene otyryp toltyrylǵan hattamada Nurbekovanyń sottalýshylarǵa táýeldi bolmaǵany kórinip tur. Ol oqiǵa ornynda Toyota Land Cruiser Prado kóliginde otyrǵan, uialy telefonyn erkin paidalanǵan, tipti sottalýshylarmen qaljyńdasyp, ashyq áńgimelesken.
“Ol oqiǵa barysyn emin-erkin talqylap, óz pikirin bildirip otyrǵan. Bul jaǵdai onyń qandai da bir qysymǵa ushyramaǵanyn kórsetedi. Bul derek sotta jaýap bergen Nurqiias Iliiasovtyń sózderimen de sáikes keledi”, — dep túiindedi advokat.
