شەرزات بولاتتىڭ ولىمىنە قاتىستى سوت پروسەسىندە جابىرلەنۋشى تاراپتىڭ قورعاۋشىسى مەيىرمان شەكەيەۆ سوتقا كۋاگەرلەردىڭ ارەكەتىنە نازار اۋدارۋدى سۇرادى. ول سوتتا ەلميرا نۇربەكوۆا مەن دانا جاقسىگەلدىنىڭ جاۋاپتارىنا قاتىستى جەكە قاۋلى شىعارىپ، ءىستى الماتى وبلىسىنىڭ پروكۋرورىنا جولداۋدى تالاپ ەتتى، دەپ حابارلايدى Dalanews.kz.
“ەلميرا نۇربەكوۆا سوت پروسەسىندە كورىنەۋ جالعان ايعاق بەرگەنى جانە اسا اۋىر قىلمىستى جاسىرىپ قالعانى ءۇشىن جاۋاپقا تارتىلۋى ءتيىس”، — دەدى قورعاۋشى.
ونىڭ ايتۋىنشا، بەينەباقىلاۋ جازباسىنا سۇيەنە وتىرىپ تولتىرىلعان حاتتامادا نۇربەكوۆانىڭ سوتتالۋشىلارعا تاۋەلدى بولماعانى كورىنىپ تۇر. ول وقيعا ورنىندا Toyota Land Cruiser Prado كولىگىندە وتىرعان، ۇيالى تەلەفونىن ەركىن پايدالانعان، ءتىپتى سوتتالۋشىلارمەن قالجىڭداسىپ، اشىق اڭگىمەلەسكەن.
“ول وقيعا بارىسىن ەمىن-ەركىن تالقىلاپ، ءوز پىكىرىن ءبىلدىرىپ وتىرعان. بۇل جاعداي ونىڭ قانداي دا ءبىر قىسىمعا ۇشىراماعانىن كورسەتەدى. بۇل دەرەك سوتتا جاۋاپ بەرگەن نۇرقياس ءىلياسوۆتىڭ سوزدەرىمەن دە سايكەس كەلەدى”، — دەپ تۇيىندەدى ادۆوكات.
