First Heartland Jusan Bank ataýynyń ózgerýine bailanysty memlekettik qaita tirkeý rásimin aiaqtady. Bul týraly banktiń baspasóz qyzmeti aqparat taratty, dep habarlaidy Dalanews.kz.
"2025 jyldyń 16 maýsymynda "Azamattarǵa arnalǵan Úkimet" memlekettik korporatsiiasy bank ataýynyń ózgerýine bailanysty memlekettik tirkeýdi qaita júrgizdi. Banktiń, ázirge eki ataýy da jeke qyzmetterde, qujattarda, aqparattyq júielerde jáne t.b. qoldanylýy múmkin. Ataýdy ózgertý boiynsha is-sharalar jalǵasýda jáne oǵan biraz ýaqyt qajet. Alaida banktiń memleket, tutynýshylary jáne áreptesteri aldyndaǵy mindettemeler sol kúiinde ózgerissiz qalady, bank ataýy almasýynyń oǵan túk qatysy joq", delingen bank habarlamasynda.
Osylaisha Jusan Bank resmi túrde Alatau City Bank-ke ainaldy.
Jusan Bank-tiń Alatau City Bank bolatyny týraly 2025 jyldyń 28 mamyrynda belgili boldy. Jusan Bank ataýynyń ózgerýi onyń Kaspi.kz-nyń teń tóraǵasy Viascheslav Kimge satylýymen bailanysty boldy. 2025 jyly aqpanda Kim QNRDA-ǵa atalǵan bankti satyp alýǵa ótinish qaldyrǵan. 2025 jyly 3 maýsymda agenttik Viascheslav Kimge "First Heartland Jusan Bank" AQ-tyń iri qatysýshysy bolý mártebesin berýge kelisti.
Jusan Bank Ahmetjan Esimovtiń burynǵy kúieý balasy Ǵalymjan Esenovtiń menshigi bolyp tabylady, naqtyraq aitqanda, ol bank aktsiiasynyń 19,67%-yna tikelei ielik etse, 78,11%-yn First Heartland Securities arqyly basqaryp kelgen.
Jusan Bank - burynǵy Tsesnabank. Ony 2019 jyly aqpanda First Heartland Securities satyp alady. Keiin qarjy institýty Jysan Bank dep atalady.
Ol kezde Tsesnabanktiń nesie portfeli "problemalyq" boldy. Sondyqtan 2017 jyly qarjylyq turaqtylyqty arttyrý baǵdarlamasy sheńberinde Jusan Bank-tiń "atasy" Tsesnabankke 100 milliard teńgeniń sýbordinarly zaemy berilgen. 2018 jyldyń aiaǵynda jáne 2019 jyldyń basynda AÓK kásiporyndaryn qarjylai saýyqtyrý jáne "QazAgro" UBH arqyly aýyl sharýashylyǵy óndirýshilerin qoldaý, sondai-aq "Agrobiznes-2020" baǵdarlamalarynyń negizgi qatysýshy retinde Tsesnabanktiń qarjylyq turaqtylyǵyn kúsheitý maqsatynda Problemalyq kreditter qory Tsesnabanktiń portfelindegi 1,054 trln teńgeniń agrokreditterin satyp alady. Onyń ishinde 450 mlrd teńge - birinshi transh jáne 604 mlrd teńge – ekinshisi.
2021 jyly Jusan Bank ATFBankti satyp aldy, sodan keiin bank ataýy Jusan dep ózgerdi.
2023 jyly shildede "Jusan toby boiynsha daýlardy beibit retteý", sondai-aq aktivterdi qazaqstandyq iýrisdiktsiiaǵa qaitarý/berý sheńberinde First Heartland Securities-diń (daýys beretin aktsiialardyń 99,745%) 8,2 mln jai aktsiiasyn Esenov Jusan Technologies Ltd-dan satyp aldy.
"Osylaisha banktiń sońǵy baqylaý tarapy jáne onyń "enshilesteri" New Generation Foundation, Inc-dan Esenov myrzanyń qolyna ótti", - dep naqtylanady banktiń qarjylyq esebinde.
2024 jyly sáýir aiynda Jusan banktiń "Samuryq-Qazyna" UÁQ-dan 100 mlrd teńgeniń sýbordinarly obligatsiialaryn merziminen buryn satyp alǵany habarlandy.
