First Heartland Jusan Bank اتاۋىنىڭ وزگەرۋىنە بايلانىستى مەملەكەتتىك قايتا تىركەۋ ءراسىمىن اياقتادى. بۇل تۋرالى بانكتىڭ باسپا ءسوز قىزمەتى اقپارات تاراتتى، دەپ حابارلايدى Dalanews.kz.
"2025 جىلدىڭ 16 ماۋسىمىندا "ازاماتتارعا ارنالعان ۇكىمەت" مەملەكەتتىك كورپوراسياسى بانك اتاۋىنىڭ وزگەرۋىنە بايلانىستى مەملەكەتتىك تىركەۋدى قايتا جۇرگىزدى. بانكتىڭ، ازىرگە ەكى اتاۋى دا جەكە قىزمەتتەردە، قۇجاتتاردا، اقپاراتتىق جۇيەلەردە جانە ت.ب. قولدانىلۋى مۇمكىن. اتاۋدى وزگەرتۋ بويىنشا ءىس-شارالار جالعاسۋدا جانە وعان ءبىراز ۋاقىت قاجەت. الايدا بانكتىڭ مەملەكەت، تۇتىنۋشىلارى جانە ارەپتەستەرى الدىنداعى مىندەتتەمەلەر سول كۇيىندە وزگەرىسسىز قالادى، بانك اتاۋى الماسۋىنىڭ وعان تۇك قاتىسى جوق"، دەلىنگەن بانك حابارلاماسىندا.
وسىلايشا Jusan Bank رەسمي تۇردە Alatau City Bank-كە اينالدى.
Jusan Bankء-تىڭ Alatau City Bank بولاتىنى تۋرالى 2025 جىلدىڭ 28 مامىرىندا بەلگىلى بولدى. Jusan Bank اتاۋىنىڭ وزگەرۋى ونىڭ Kaspi.kz-نىڭ تەڭ ءتوراعاسى ۆياسچەسلاۆ كيمگە ساتىلۋىمەن بايلانىستى بولدى. 2025 جىلى اقپاندا كيم قنردا-عا اتالعان بانكتى ساتىپ الۋعا ءوتىنىش قالدىرعان. 2025 جىلى 3 ماۋسىمدا اگەنتتىك ۆياسچەسلاۆ كيمگە "First Heartland Jusan Bank" اق-تىڭ ءىرى قاتىسۋشىسى بولۋ مارتەبەسىن بەرۋگە كەلىستى.
Jusan Bank احمەتجان ەسىموۆتىڭ بۇرىنعى كۇيەۋ بالاسى عالىمجان ەسەنوۆتىڭ مەنشىگى بولىپ تابىلادى، ناقتىراق ايتقاندا، ول بانك اكسياسىنىڭ 19،67%-ىنا تىكەلەي يەلىك ەتسە، 78،11%-ىن First Heartland Securities ارقىلى باسقارىپ كەلگەن.
Jusan Bank - بۇرىنعى سەسنابانك. ونى 2019 جىلى اقپاندا First Heartland Securities ساتىپ الادى. كەيىن قارجى ينستيتۋتى Jysan Bank دەپ اتالادى.
ول كەزدە سەسنابانكتىڭ نەسيە پورتفەلى "پروبلەمالىق" بولدى. سوندىقتان 2017 جىلى قارجىلىق تۇراقتىلىقتى ارتتىرۋ باعدارلاماسى شەڭبەرىندە Jusan Bankء-تىڭ "اتاسى" سەسنابانككە 100 ميلليارد تەڭگەنىڭ سۋبوردينارلى زاەمى بەرىلگەن. 2018 جىلدىڭ اياعىندا جانە 2019 جىلدىڭ باسىندا اوك كاسىپورىندارىن قارجىلاي ساۋىقتىرۋ جانە "قازاگرو" ۇبح ارقىلى اۋىل شارۋاشىلىعى وندىرۋشىلەرىن قولداۋ، سونداي-اق "اگروبيزنەس-2020" باعدارلامالارىنىڭ نەگىزگى قاتىسۋشى رەتىندە سەسنابانكتىڭ قارجىلىق تۇراقتىلىعىن كۇشەيتۋ ماقساتىندا پروبلەمالىق كرەديتتەر قورى سەسنابانكتىڭ پورتفەلىندەگى 1،054 ترلن تەڭگەنىڭ اگروكرەديتتەرىن ساتىپ الادى. ونىڭ ىشىندە 450 ملرد تەڭگە - ءبىرىنشى ترانش جانە 604 ملرد تەڭگە – ەكىنشىسى.
2021 جىلى Jusan Bank اتفبانكتى ساتىپ الدى، سودان كەيىن بانك اتاۋى Jusan دەپ وزگەردى.
2023 جىلى شىلدەدە "Jusan توبى بويىنشا داۋلاردى بەيبىت رەتتەۋ"، سونداي-اق اكتيۆتەردى قازاقستاندىق يۋريسديكسياعا قايتارۋ/بەرۋ شەڭبەرىندە First Heartland Securitiesء-دىڭ (داۋىس بەرەتىن اكسيالاردىڭ 99،745%) 8،2 ملن جاي اكسياسىن ەسەنوۆ Jusan Technologies Ltd-دان ساتىپ الدى.
"وسىلايشا بانكتىڭ سوڭعى باقىلاۋ تاراپى جانە ونىڭ "ەنشىلەستەرى" New Generation Foundation، Inc-دان ەسەنوۆ مىرزانىڭ قولىنا ءوتتى"، - دەپ ناقتىلانادى بانكتىڭ قارجىلىق ەسەبىندە.
2024 جىلى ءساۋىر ايىندا Jusan بانكتىڭ "سامۇرىق-قازىنا" ءۇاق-دان 100 ملرد تەڭگەنىڭ سۋبوردينارلى وبليگاسيالارىن مەرزىمىنەن بۇرىن ساتىپ العانى حابارلاندى.
