«Semey Bus» kásiporyny qaryzǵa belsheden batqan
"Semey Bus" JShS basshysy búgin sot oryndaýshylaryna lizingtik avtobýstardyń kiltteri men qujattaryn tapsyrmastan, ǵimarattan shyǵyp ketti.
Olardyń esikterin ashyp, iske qosýǵa arnaiy mamandardyń kómegine júginýge týra kelgen. Sondai-aq, olar aýmaqqa evakýatorlardy da kirgizbegen. Olar apattyq jaǵdaidaǵy 70 kólikti alyp ketýi kerek bolatyn.
Bul jaǵdai sot sheshiminiń oryndalýyna tikelei kedergi keltirip otyr. Esterińizge sala keteiik, 18 maýsymda mamandandyrylǵan aýdanaralyq ekonomikalyq sot "Semey Bus" JShS-ǵa lizing zattaryn talap etý týraly "ónerkásipti damytý qorynyń" talap aryzyn qarap, qanaǵattandyrǵan edi.
Kásiporyn jaýap retinde apelliatsiialyq satyǵa jeke shaǵym túsirdi. Biraq 10 tamyzda azamattyq ister jónindegi alqa MAES sheshimin ózgerissiz qaldyrdy.
Kompaniia birneshe ret affiliirlengen kompaniialardyń kómegimen bankrottyq rásimge qol jetkizýge tyrysty. Degenmen, olardyń bul qadamy sátti bolǵanymen, avtobýstardy qaitarýǵa týra kelgen edi.
"Qarjy lizingi týraly" QR Zańyna sáikes lizing nysanasyna menshik quqyǵy lizing berýshide sharttyń búkil merzimi ishinde saqtalady. Tyiym salýǵa jáne tárkileýge jol berilmeidi. Al "Ońaltý jáne bankrottyq týraly" zań boiynsha bankrot múlkine aýyrtpalyq salynady.
170 avtobýs "Semey Bus" menshiginde bolmaidy. Sondyqtan qalǵan kólik quraldaryn qaitaryp, lizingtik jáne basqa tólemder boiynsha qaryzdardy jabýǵa týra keledi.
Esterińizge sala keteiik, "Semey Bus" JShS-men birqatar janjaldarǵa bailanysty, qazir kásiporyn qiyn jaǵdaida, túrli instantsiialar men óz qyzmetkerleriniń aldyndaǵy qaryzdar 2,1 milliard teńgeni quraidy.
Osy ýaqytqa deiin qyzmetkerlerge zeinetaqy jáne áleýmettik aýdarymdar jasalmaǵan. Bul tólemderdiń somasy 195 million teńgeni qurasa, ótelmegen salyq quny 395 mln teńgege jetip otyr.
Eń basty qaryz – bul "Ónerkásipti damytý qory" AQ-daǵy lizingtik tólemder, 1 milliard 212 million teńgeni quraǵan. Bul qaryz, qordyń tólemderdi 8 aiǵa keiinge qaldyrýyna qaramastan oryn alyp otyr.
Aita ketý kerek, kásiporynda jalaqy únemi keshiktirilip otyrdy, bul óz kezeginde qyzmetkerlerdiń 12 ret narazylyq aktsiiasyna shyǵýyna sebep boldy. Al sońǵy 2 aida "Semey Bus" JShS qalalyq baǵyttardaǵy qozǵalysty múldem toqtatty.\
