Sot saiasatkerdi 3 birdei qylmystyq bap boiynsha kináli dep tapty.
Onyń 6 jylǵa shartty túrde bas bostandyǵy shekteldi. Oǵan qoǵamdyq jáne saiasi jumyspen ainalysýǵa, qoǵamdyq uiymdardyń jumysyna aralasýǵa tyiym salyndy. Sondai-aq Mamaidan 800 myń teńgeden astam aqsha óndiriledi.
Aita ketelik, Janbolat Mamaiǵa «Qasaqana jalǵan aqparat taratý» (274-bap), «Bilik ókilin qorlaý» (378-bap) jáne «Jappai tártipsizdikter uiymdastyrý» (272-bap) boiynsha aiyptar taǵylǵan edi.
Alǵashqy eki taraý 2021 jylǵy oqiǵalarǵa, al úshinshisi 2022 jylǵy qańtardaǵy oqiǵalarǵa qatysty bolyp otyr.
"Qazaqstannyń demokratiialyq partiiasyn" tirkei almaǵan oppozitsiiadaǵy saiasatker Janbolat Mamai byltyr aqpanda Qańtar qurbandaryn eske alý jiynyna qatysqany úshin ustalǵan. 15 kún ákimshilik qamaýǵa alynǵan Mamai izinshe tergeý izoliatoryna aýystyryldy. Oǵan "jalǵan aqparat taratý" jáne "bilik ókilin qorlaý" baptary boiynsha aiyp taǵyldy.
Birneshe aidan soń Janbolat Mamaiǵa Qańtar oqiǵasy kezinde "jappai tártipsizdik uiymdastyrdy" degen taǵy bir aiyp taǵyldy.
Mamai sol kezde "bilik meni 4 qańtarda "Almaty Arena" kesheni mańyndaǵy mitingini uiymdastyrdy dep kinálaǵysy keledi" degen. 1000-nan astam adam jinalǵan mitingini sol kúni politsiia kúshtep taratqan edi.
Mamai taǵylǵan aiypty joqqa shyǵaryp, tártipsizdikke qatyspaǵanyn aitqan. Aiyptardy saiasi qýdalaý dep ataǵan.
Qazan aiynda Janbolat Mamaidyń áieli Inga Imanbai Eýroparlamenttegi sózinen bir kún buryn kúieýine taǵylǵan "jappai tártipsizdik uiymdastyrdy" degen aiyp "beibit jiyn ótkizý tártibin buzý" (400-bap) babymen almastyrylǵanyn habarlaǵan edi. Inga Imanbai Janbolat Mamaiǵa taǵylǵan aiyptyń jeńildeýine halyqaralyq qysym túrtki boldy dep esepteidi.
27 naýryzda ótken sot otyrysynda sóilegen sózinde Janbolat Mamai ózine taǵylǵan aiyppen kelispeitinin málimdegen.
