سوت ساياساتكەردى 3 بىردەي قىلمىستىق باپ بويىنشا كىنالى دەپ تاپتى.
ونىڭ 6 جىلعا شارتتى تۇردە باس بوستاندىعى شەكتەلدى. وعان قوعامدىق جانە ساياسي جۇمىسپەن اينالىسۋعا، قوعامدىق ۇيىمداردىڭ جۇمىسىنا ارالاسۋعا تىيىم سالىندى. سونداي-اق مامايدان 800 مىڭ تەڭگەدەن استام اقشا وندىرىلەدى.
ايتا كەتەلىك، جانبولات مامايعا «قاساقانا جالعان اقپارات تاراتۋ» (274-باپ)، «بيلىك وكىلىن قورلاۋ» (378-باپ) جانە «جاپپاي تارتىپسىزدىكتەر ۇيىمداستىرۋ» (272-باپ) بويىنشا ايىپتار تاعىلعان ەدى.
العاشقى ەكى تاراۋ 2021 جىلعى وقيعالارعا، ال ءۇشىنشىسى 2022 جىلعى قاڭتارداعى وقيعالارعا قاتىستى بولىپ وتىر.
"قازاقستاننىڭ دەموكراتيالىق پارتياسىن" تىركەي الماعان وپپوزيسياداعى ساياساتكەر جانبولات ماماي بىلتىر اقپاندا قاڭتار قۇرباندارىن ەسكە الۋ جيىنىنا قاتىسقانى ءۇشىن ۇستالعان. 15 كۇن اكىمشىلىك قاماۋعا الىنعان ماماي ىزىنشە تەرگەۋ يزولياتورىنا اۋىستىرىلدى. وعان "جالعان اقپارات تاراتۋ" جانە "بيلىك وكىلىن قورلاۋ" باپتارى بويىنشا ايىپ تاعىلدى.
بىرنەشە ايدان سوڭ جانبولات مامايعا قاڭتار وقيعاسى كەزىندە "جاپپاي تارتىپسىزدىك ۇيىمداستىردى" دەگەن تاعى ءبىر ايىپ تاعىلدى.
ماماي سول كەزدە "بيلىك مەنى 4 قاڭتاردا "الماتى ارەنا" كەشەنى ماڭىنداعى ميتينگىنى ۇيىمداستىردى دەپ كىنالاعىسى كەلەدى" دەگەن. 1000-نان استام ادام جينالعان ميتينگىنى سول كۇنى پوليسيا كۇشتەپ تاراتقان ەدى.
ماماي تاعىلعان ايىپتى جوققا شىعارىپ، تارتىپسىزدىككە قاتىسپاعانىن ايتقان. ايىپتاردى ساياسي قۋدالاۋ دەپ اتاعان.
قازان ايىندا جانبولات مامايدىڭ ايەلى ينگا يمانباي ەۋروپارلامەنتتەگى سوزىنەن ءبىر كۇن بۇرىن كۇيەۋىنە تاعىلعان "جاپپاي تارتىپسىزدىك ۇيىمداستىردى" دەگەن ايىپ "بەيبىت جيىن وتكىزۋ ءتارتىبىن بۇزۋ" (400-باپ) بابىمەن الماستىرىلعانىن حابارلاعان ەدى. ينگا يمانباي جانبولات مامايعا تاعىلعان ايىپتىڭ جەڭىلدەۋىنە حالىقارالىق قىسىم تۇرتكى بولدى دەپ ەسەپتەيدى.
27 ناۋرىزدا وتكەن سوت وتىرىسىندا سويلەگەن سوزىندە جانبولات ماماي وزىنە تاعىلعان ايىپپەن كەلىسپەيتىنىن مالىمدەگەن.
