2025 jyly 40-tan astam aýditorlyq is-shara ótkizý josparlanǵan. Sonyń ishinde Memleket basshysynyń tapsyrmasy boiynsha Astana jáne Almaty qalalary, Soltústik Qazaqstan, Qostanai jáne Jambyl oblystary, sondai-aq "Samuryq-Qazyna" qory, "Qazatomónerkásip" ulttyq kompaniiasy, KEGOC kásiporny, Ulttyq bank, Tótenshe jaǵdailar ministrligi biýdjetteriniń oryndalý barysy tekseriledi, dep jazady Dalanews.kz.
Bul týraly búgin Memleket basshysy qabyldaýynda bolǵan Joǵary aýditorlyq palatanyń tóraǵasy Álihan Smaiylov aitty.
Álihan Smaiylov Prezidentke joǵary aýditorlyq palatanyń byltyr atqarǵan qyzmetiniń qorytyndylary men osy jylǵa arnalǵan jospary jóninde málimet berip, byltyr 214 nysanda quny shamamen 11 trillion teńgeni quraityn 27 aýditorlyq is-shara ótkizilgeni týraly baiandady:
- sonyń nátijesinde jalpy somasy 862 milliard teńge bolatyn túrli normalardyń buzylǵany anyqtalǵan;
- tekseristerdiń qorytyndysy boiynsha biýdjetke 135 milliard teńge qaitarylǵan. Bul 2023 jyly ótelgen qarjydan bes ese artyq.
Sondai-aq bas aýditor qurylys nysandaryndaǵy baǵa qalyptastyrý, óńdeý ónerkásibi jobalaryn qarjylandyrý, aýyl sharýashylyǵyn sýbsidiialaý isinde olqylyqtar únemi baiqalatynyn aitty. Joǵary aýditorlyq palata barlyq anyqtalǵan zań buzýshylyqty joiý úshin Úkimetke usynym berip, jaýapty memlekettik organdarǵa nusqama joldaǵan.
Álihan Smaiylov biyl 40-tan astam aýditorlyq is-shara ótkizý josparlanǵanyn jetkizdi, sonyń ishinde:
- Memleket basshysynyń tapsyrmasy boiynsha Astana jáne Almaty qalalary, Soltústik Qazaqstan, Qostanai jáne Jambyl oblystary, sondai-aq "Samuryq-Qazyna" qory, "Qazatomónerkásip" ulttyq kompaniiasy, KEGOC kásiporny, Ulttyq bank, Tótenshe jaǵdailar ministrligi biýdjetteriniń oryndalýy tekseriledi;
- ǵylym, qorǵanys, quqyqtyq tártipti saqtaý, sport, áleýmettik qamtamasyz etý, orman sharýashylyǵy salalarynda aýditorlyq tekserister júrgiziledi.
Prezident memlekettik aýdit júiesin jetildirý jónindegi jumysty jalǵastyrýdy tapsyrdy. Sonymen qatar biýdjet qarjysynyń igerilýin tiimdi baqylaý úshin zamanaýi tsifrlyq sheshimderdi engizýdiń mańyzyna nazar aýdardy.
Aita ketsek, Qazaqstan Prezidenti Qasym-Jomart Toqaev 2025 jyly 27 qańtarda ótken Úkimettiń keńeitilgen otyrysynda "Samuryq-Qazyna" ulttyq qoryn reformalaý barysyna kóńili tolmaitynyn jetkizgen edi. Al birqatar sarapshylar ulttyq kompaniialardy asyra belgilengen bonýs pen divident túrinde aqshany ońdy-soldy shashady dep aiyptaidy.
