Qazir qaryndasynyń esimin qaralamai, onyń ólimine sebepker bolǵan adamdar zań túrinde qatań jazalanýyna baryn salýda. Elimizdiń bilikti advokattary kómekke kelip, kún saiyn sot protsesinde múddelerin qorǵap keledi. Odan bólek, qanshama qazaqstandyq marqumnyń aǵasyna jan-jaqty qoldaý bildirip keledi.
Aitbek Amangeldi Dana Ormanbaevanyń «Dai slovo» baǵdarlamasyna bergen suhbatynda túsinde Saltanatty kórgenin aitty. Aitýynsha, túsi óte anyq, uzaq jáne shyn ómirdegidei bolǵan.
«Túsimde Saltanatty izdep júr ekenmin. Nege ekenin bilmeimin, aldymen ýniversitetke baryp, izdemekshi boldym. Biraq meni ishine kirgizbedi. Sol kezde janyma bir adam keldi, biraq onyń túri joq, bulyńǵyr kóleńke siiaqty. Kúzet bizdi Saltanattyń oqytýshysyna jibergisi kelmedi. Janymdaǵy obraz basqa jolmen barýdy usyndy. Biz oqytýshynyń kabinetine kirip, sóileskimiz kelse, ol úndemei otyr. Janymdaǵy adamnyń kóleńkesi oqytýshyǵa alma usyndy, jemisti alyp, jei bastaǵan soń, bizben sóilese bastady. Sol sátte kúzet bizdi taýyp aldy. Biz qashyp baramyz. Ýniversitet bir shyńda ornalasqandai. Biikke qarai qashyp baramyz, kúzet bizdi qýyp keledi. Tómende sai ornalasqan, ol jerde bulaq aǵyp tur. Tómenge aparatyn jol tik ornalasqan. Tómenge qarai sýmen syrǵanap túsip baramyz. Tómende qudyq bar siiaqty, bulaqtyń sýy sol jerge quiylady eken. Janymdaǵy kóleńke ári qarai ketip qaldy, al meni sol qudyqqa soryp áketti. Sý óte sýyq, muzdai. Qoldarym men denem sýyq sýdan qaqsap barady. Ári qarai bir aýylǵa tap boldyq. Ol jerde úiler óte kóp, jan-jaǵynda janýarlardyń barlyq túrleri júr. Aýyl balshyqqa toly, óte las. Janymdaǵy kóleńke meni belgili bir úige apara jatyr. Aldymyzdan ádemi toi ótkizetin ǵimarat shyqty. Appaq mármár tastan jasalǵan. Ishine kirsek, barlyq adamdar merekelik kiim kiip alǵan, barlyǵy shetinen ádemi. Aldymyzdan taǵy bir esik ashylǵanda, bir top ádemi jas qyzdar shyqty. Arasynda Saltanat bar. Qolynan ustap, qaida júrsiń, men seni izdep júrmin, dedim. Ata-anamyzǵa habarlasyp, seni tapqanymdy aitaiyn dedim. Telefonymdy alyp, sýretke túsirmek boldym. Sýretke túsip, telefonyma qarasam, sýrette menen basqa eshkim joq. Saltanat sol sátte janyna bir áieldi shaqyrdy. Menińshe, ol da meniń janymdaǵy kóleńke siiaqty. Saltanat meni basqa bir balalarǵa arnalǵan bólmege apardy. Tórteýmiz kirdik. Sol kezde men odan ne bolyp jatqanyn túsindirýdi suradym. Janyndaǵy áiel meniń bilmeý kerektigimdi aitty. Saltanat ol áielge meniń bilý kerektigimdi, men túsinbei júrgenimdi túsindirip jatyr. Keiin ózi túsindire bastady. Daýystar men áripter aitylyp jatyr, biraq men ne aityp jatqanyn túsinbeimin. Keiin ol qolymen eki sandy jazyp kórsetti. 11 sanyn jazdy. Men jazyp aldym. Sol sátte jelkemnen bireý qysyp ustap, julyp shyǵardy. Men oianyp, tósegimnen atyp turdym», - dep baiandady túsin.
Bul tústi aǵasy qarasha aiynyń ortasynda kórgen. Kórgenin jaqyn adamymen bólisken. Ol áiel meshitte jumys isteidi. Aitýynsha, ol áieldiń ólgen adamdardyń rýhymen sóilese alatyn qasieti bar. Saltanat oǵan jerleý rásimine qatysyp, sóz sóileýdi suraǵan eken.
Keshe, iaǵni 11 sáýir kúni Qazaqstan parlamenti turmystyq zorlyq-zombylyq týraly zań qabyldady. Atalǵan zań áielder men balalardyń qaýipsizdigin kúsheitedi.
Osy tusta Aitbek Amangeldi túsinde kórgen sol eki sandy «11» dep ózinshe joramaldady. Oiynsha, Saltanat oǵan aian bergen.
11 sany:
11 qarasha – Saltanat jer qoinyna tapsyryldy;
11 naýryz – Bishimbaevtyń isi boiynsha aldyn ala tyńdalym ótti;
11 sáýir #Saltanatzańy qabyldandy.
«Endi ne bolady? Taǵy bir aitylmaǵan dúnie bar. Ony sot otyrysy aiaqtalǵan soń aitamyn», - dep jazdy Aitbek Amangeldi.
