"Búgin ulttyq valiýtaǵa shaqqanda 1 rýbl quny 7,2 teńgege jetti. Osy jaǵdai ary qarai da saqtala berse, Qazaqstannan otyn tasý úrdisi taǵy da údeýi yqtimal". Munai salasynyń mamany Oljas Baidildinov osylai dep dabyl qaǵady. Onyń aitýynsha, ótken jyly eki eldiń valiýtasy arasynda teńgerim júrgizilip, soltústik óńirden janar-jaǵarmai otyndaryn tasyp áketýdiń ekonomikalyq maǵynasy joiylǵan. Biraq, ókinishke qarai, biyl jaǵdai taǵy qaitalanýda, dep habarlaidy Dalanews.kz.
Byltyr jaǵdaidy turaqtandyrý úshin tórt birdei vedomstvo birigip, buiryq shyǵarǵan. Atap aitqanda, Energetika ministrligi, QR UQK, QR IIM jáne Qarjy ministrligi.
"RF-da qazirgi bólshek saýdadaǵy baǵa 57-59 rýbldi qurap, onyń 65 rýblge deiin qymbattaýy boljanýda. Al AI-95-tiń 1 litri qazirdiń ózinde 63-65 rýblden satylýda, sondyqtan bul rettegi baǵa 70 rýblge barady degen de paiym bar. Jalpy, 57 rýbl degenimiz qazirgi teńge/rýbl araqatynasynda 400 teńge degendi bildiredi. Elimizdiń ishki naryǵyndaǵy baǵadan eki esegege jýyq artyq kólem. Demek, kontrabandashylarǵa munyń ońynan keleri sózsiz. Ainalymdaǵy kapitaldy bir kúnde eki esege ósirý múmkindigin kim qalt jibersin deisiz?... Alaiaqtardyń ózi mundai tabysty ýáde ete bermeidi", dep jazady Baidildinov jelidegi paraqshasynda.
Onyń aitýynsha, kóleńkeli biznestiń kórigi qyzsa, arǵy jaǵynan tapshylyqtyń oryn alary anyq. Onda da kúzge taman. Naǵyz jiyn-terim kezinde.
"Jalpy, bul tek benzinge qatysty másele emes. Kórshimen salystyrǵandaǵy aqsha baǵamy ózge de taýarlardyń zańsyz syrtqa áketilýin bildire alady", - deidi ol.
Buǵan deiin saitymyzda "Qazaqstandaǵy iri qarjylyq toptar osy aptada dollarlaryn sata bastamaq - DALA INSIDE" degen maqala jariialanǵan bolatyn.
