Almaty qalasynyń joǵary oqý oryndarynda 1 shildeden bastap kúshine enetin Qazaqstan Respýblikasynyń jańa Konstitýtsiiasyna arnalǵan aqparattyq-túsindirý is-sharalarynyń seriiasy ótti. Is-sharalar stýdentterdi, oqytýshylardy jáne jas ǵalymdardy biriktirdi, dep habarlaidy dalanews.kz.
22–30 maýsym aralyǵynda qalanyń jetekshi joǵary oqý oryndarynyń bazasynda 13 dóńgelek ústel, ǵylymi-praktikalyq seminar, saraptamalyq pikirtalas, dáris jáne ashyq kezdesý uiymdastyryldy. Is-sharalarǵa professorlyq-oqytýshylyq quram, jas ǵalymdar, zańgerler men stýdentter qatysty. Kezdesýler barysynda Konstitýtsiianyń jańa normalary, quqyqtyq memleket qaǵidattary, azamattyq jaýapkershilik jáne jastardyń zamanaýi Qazaqstannyń damýyna qosatyn úlesi talqylandy.
Is-sharalar M.Tynyshpaev atyndaǵy ALT ýniversitetinde, Narxoz ýniversitetinde, Qazaq ulttyq qyzdar pedagogikalyq ýniversitetinde, Qonaev ýniversitetinde, Abylai han atyndaǵy Qazaq halyqaralyq qatynastar jáne álem tilderi ýniversitetinde, Qurmanǵazy atyndaǵy Qazaq ulttyq konservatoriiasynda, Sankt-Peterbýrg gýmanitarlyq kásipodaqtar ýniversitetiniń Almaty filialynda, Almaty tehnologiialyq ýniversitetinde jáne Halyqaralyq aqparattyq tehnologiialar ýniversitetinde ótti.
Kezdesýler barysynda Konstitýtsiianyń árbir azamat úshin praktikalyq mańyzyna, quqyqtyq mádenietti qalyptastyrýǵa, zańǵa qurmet kórsetýge jáne jastardyń belsendi azamattyq ustanymyn damytýǵa erekshe nazar aýdaryldy.
«Qazaqstan Respýblikasynyń Konstitýtsiiasy jastarǵa sapaly bilim alýǵa, eńbek etýge, kásipkerlikpen ainalysýǵa jáne qoǵamdyq ómirge belsendi qatysýǵa keń múmkindik beredi. Búginde memleket jastardyń áleýetin júzege asyrý úshin barlyq qajetti jaǵdaidy jasap otyr. Alaida kez kelgen quqyq úlken jaýapkershilikpen qatar júredi. Zańdy qurmetteý, azamattyq ustanymdy qalyptastyrý jáne eldiń damýyna úles qosý – árbir jastyń basty mindeti», – dep atap ótti Oljas Alimov, Qazaqstan-Britan tehnikalyq ýniversiteti zań departamentiniń direktory, «Ádilet» joǵary quqyq mektebiniń aǵa oqytýshysy.
Qazaq ulttyq qyzdar pedagogikalyq ýniversitetiniń halyqaralyq yntymaqtastyq bóliminiń basshysy Saltanat Djakýbaevanyń aitýynsha, quqyqtyq memleketti qalyptastyrý jastardyń belsendi qatysýynsyz múmkin emes.
«Belsendi azamattyq qoǵam óz quqyqtaryn biletin, zańdy qurmetteitin jáne eldiń damýyna beijai qaramaityn azamattardan qalyptasady. Sondyqtan jastar úshin ashyq dialog alańdaryn quryp, olardy qoǵamdyq ómirge keńinen tartý asa mańyzdy», – dedi ol.
Uiymdastyrýshylardyń aitýynsha, ótkizilgen is-sharalar stýdentterdiń Konstitýtsiianyń jańa normalarynyń praktikalyq mańyzyn tereńirek túsinýine, azamattardyń quqyqtaryn qorǵaý, zań ústemdigi qaǵidattary, azamattyq jaýapkershilik jáne jastardyń qoǵamdyq ómirge qatysýy máselelerin jan-jaqty talqylaýyna múmkindik berdi.
Kezdesýler barysynda «Zań men tártip» qaǵidatyna, azamattyq qoǵamdy damytýǵa, jastar bastamalaryn qoldaýǵa, volonterlikti damytýǵa, ekologiialyq mádenietti qalyptastyrýǵa jáne memlekettik rámizderge qurmet kórsetýge erekshe kóńil bólindi.
Qazaqstan Respýblikasy Konstitýtsiiasynyń negizgi qaǵidattaryn keńinen nasihattaý jumystary aldaǵy ýaqytta da jalǵasady. 10 shildege deiin Almaty qalasynyń joǵary oqý oryndary men jastar keńistikterinde jastardyń quqyqtyq saýattylyǵyn arttyrýǵa jáne konstitýtsiialyq qundylyqtardy nyǵaitýǵa baǵyttalǵan taǵy onǵa jýyq aqparattyq-túsindirý is-sharasyn ótkizý josparlanǵan.
