Qazaqstanda kelesi jyldan bastap elektr qýaty úshin tólenetin aqy ósýi yqtimal. Bul týraly "Aqmola óńirlik elektr jelilik kompaniiasynyń" (AREK) elektr energiiasy tarifin kóterý týraly ótinishinde aitylǵan, dep habarlaidy dalanews.kz.
Qujatqa sáikes elektr qýatynyń júktemeni qamtamasyz etý qyzmetiniń tarifi 2026 jyly aiyna 1 MVt úshin QQS-syz 1 560 850 teńge bolǵan. Al 2027 jyly bul kórsetkishti 2,3 mln teńgege deiin kóterý josparlanyp otyr.
Usynylǵan ózgeris qabyldansa, elektr qýaty úshin tólem shamamen 47 paiyzǵa ósedi.
Elektr energiiasynyń túpkilikti tarifine elektr qýaty úshin tólem de kiredi. Ol jańa elektr stantsiialaryn salý, jańǵyrtý jáne qaita jańartý jobalaryn qarjylandyrýǵa baǵyttalǵan arnaiy naryq arqyly qalyptasady. Bul júie 2019 jyldan beri jumys isteidi jáne energetika salasyna investitsiia tartýǵa arnalǵan.
Sarapshylardyń boljamynsha, tólemniń ósýine Túrkistandaǵy bý-gaz qondyrǵysy iske qosylýy jáne Almatydaǵy JEO-2 men JEO-3-tiń gazǵa kóshý jobalary áser etýi múmkin. Bul nysandar paidalanýǵa berilse, olar investitsiia shyǵynyn óteý úshin elektr qýaty naryǵynan tólem ala bastaidy.
Sonymen qatar, Energetika ministrligi elektr stantsiialarynyń tarifin shildeden bastap kóterý týraly jospardy keiinge qaldyrdy. Bul sheshim qabyldanǵanda, elektr energiiasynyń kóterme baǵasy bir kilovatt-saǵat úshin QQS-syz 32,92 teńgeden 42,89 teńgege deiin óser edi.
Mamandardyń aitýynsha, kóterme baǵa ósýi elektr jelilerindegi shyǵyndy da arttyrady. Sonyń saldarynan elektr energiiasyn tasymaldaý tarifi ósip, bul ózgeris túpkilikti tutynýshy tóleitin baǵaǵa da áser etýi múmkin.
