Qazaqstannyń Ádilet ministri Erlan Sársembaev jańa Konstitýtsiia kúshine engennen keiin memlekettik bilikti qaita qalyptastyrý kezeńi qalai ótetinin túsindirdi, dep habarlaidy dalanews.kz.
Ministrdiń aitýynsha, jańa Konstitýtsiia 1 shildeden bastap kúshine enedi. Osy kúnnen bastap Konstitýtsiianyń ótpeli erejeleri iske qosylyp, memlekettik organdardy jańadan qalyptastyrý protsesi bastalady.
«Munyń barlyǵyn shilde-tamyz ailarynyń ishinde kóresizder. Zańnamalyq turǵydan alǵanda bári Konstitýtsiiada kózdelgen. Eger osy eki aidyń ishinde qandai da bir zań qabyldaý qajet bolsa, jańa Konstitýtsiia boiynsha eki múmkindik bar. Birinshisi – Prezident shuǵyl qajettilik týyndaǵan jaǵdaida zań kúshi bar jarlyq shyǵara alady. Ekinshisi – Konstitýtsiiada tikelei kórsetilgen jaǵdailar oryn alsa, Úkimet ýaqytsha zań kúshi bar qaýlylar qabyldai alady. Tek osyndai jaǵdaida ǵana zańnamalyq túzetýler engizýge múmkindik beriledi», – dedi Erlan Sársembaev.
Onyń sózinshe, ótpeli kezeńniń barlyq rásimi Konstitýtsiianyń 94, 95 jáne 96-baptarynda naqty jazylǵan.
«Erteńnen bastap jańa Konstitýtsiia kúshine enedi. Ótpeli erejelerdiń barlyǵy Konstitýtsiianyń 94, 95 jáne 96-baptarynda egjei-tegjeili kórsetilgen. Erteńnen bastap alty laýazymdy tulǵa eki aidyń ishinde qaita taǵaiyndalýy tiis. Sonymen qatar jańa memlekettik saiasi kezeń bastalyp, Quryltai sailaýyna daiyndyq jariialanady. Al qyrkúiek aiynda Úkimet jańadan sailanǵan Quryltai aldynda óz ókilettigin toqtatady. Osydan keiin Quryltaidyń kelisimimen Vitse-prezident, Úkimet músheleri jáne Konstitýtsiiada kórsetilgen basqa da laýazymdy tulǵalar taǵaiyndalady», – dedi ministr.
Jýrnalister qaita taǵaiyndalatyn alty laýazym týraly suraǵanda, ministr olardyń Konstitýtsiiada naqty kórsetilgenin aitty.
«Bul laýazymdardyń barlyǵy Konstitýtsiianyń 95-babynda kórsetilgen. Olar – Bas prokýror, Ulttyq bank tóraǵasy, Joǵarǵy sottyń tóraǵasy, Joǵary sot keńesiniń tóraǵasy jáne Adam quqyqtary jónindegi ýákil. Osy sanattaǵy laýazymdar erteńnen bastap eki aidyń ishinde qaita taǵaiyndalýy tiis. Qazirgi qyzmet ieleri qala ma degen suraqqa kelsek, ony erteńnen bastap kóretin bolamyz», – dedi Erlan Sársembaev.
