Prezident Qasym-Jomart Toqaev Parlament palatalarynyń sońǵy birlesken otyrysynda sóz sóilep, búgingi kúnniń Qazaqstan tarihyndaǵy airyqsha mańyzyn atap ótti, dep habarlaidy dalanews.kz.
Memleket basshysynyń aitýynsha, qazirgi Parlamenttiń ókilettigi aiaqtalyp, el jańa Konstitýtsiia negizindegi memlekettik basqarýdyń jańa kezeńine qadam basady.
«Búgingi Parlament palatalarynyń birlesken otyrysynyń tarihi mańyzy erekshe. Biz zań shyǵarýshy organnyń kezekti sessiiasyn aiaqtai otyryp, táýelsiz Qazaqstannyń damýyndaǵy tutas bir dáýirdiń qorytyndysyn shyǵaryp otyrmyz. Osylaisha, tamyry tereń tarihtan bastaý alatyn memlekettiligimizdiń jańa kezeńine qadam basamyz. Erteń Qazaqstan Respýblikasynyń jańa Konstitýtsiiasy resmi túrde kúshine enedi», – dedi Qasym-Jomart Toqaev.
Prezidenttiń aitýynsha, jańa Konstitýtsiiamen birge memlekettik bilik júiesi de ózgeredi. Qos palataly Parlamenttiń ornyna Ulttyq quryltai keledi.
Memleket basshysy bul sheshim Qazaqstannyń tarihi sabaqtastyǵyn aiqyndaitynyn atap ótti.
«Osydan otyz jyldan astam ýaqyt buryn elimizde alǵashqy kásibi Parlament quryldy. Jańa institýtsionaldyq modelge kóshken zań shyǵarýshy organ shirek ǵasyrdan astam ýaqyt ishinde memlekettilikti nyǵaitýǵa zor úles qosty, elimizdiń quqyqtyq negizin qalyptastyrýda jáne naryqtyq ekonomikany ornyqtyrýda airyqsha ról atqardy. Osy 30 jyl ishinde shamamen 3,5 myń mańyzdy zań qabyldandy. Onyń árbir onynshysynyń bastamashysy depýtattardyń ózderi boldy», – dedi Prezident.
Qasym-Jomart Toqaev Parlamenttiń barlyq shaqyrylymynyń depýtattaryna alǵys aityp, qazirgi quramnyń jumysyna joǵary baǵa berdi.
«Osy tarihi sátte Májilis pen Senattyń barlyq shaqyrylymdaǵy depýtattaryna elimizge adal ári minsiz qyzmet etkeni úshin shynaiy rizashylyǵymdy bildiremin. Ásirese qazirgi Parlament quramyna erekshe alǵys aitamyn. Senimmen aita alamyn, bul shaqyrylym táýelsiz Qazaqstan tarihyndaǵy eń myqty quramdardyń biri boldy», – dedi Memleket basshysy.
