Sońǵy kúnderi bizdegidei Reseide dollar arzandap jatyr. RF Ortalyq banktiń 2025 jyldyń 17 aqpanynda bekitken 1 AQSh dollarynyń quny - 89 rýbl. Reseilik sarapshylar baǵam 80 rýblge deiin tómendeitinin boljaidy. Alaida reseilikter osy arzan dollardy tappai qalyp, seńdei soǵylýda. Óitkeni keibir aqsha aiyrbas oryndary jabyq tur, dep jazady Dalanews.kz.
Aita ketsek, bizde 2024 jyly qarasha dollar baǵamy 500 degen psihologiialyq shekti igergende, Reseide ol 120 rýblge deiin barǵan, sodan 110 rýblge túsip, amerikalyq valiýtanyń baǵamy kúni keshege deiin sonyń ainalasynda turaqtap turǵan edi. Al Tramptyń Resei men Ýkrainanyń beibit kelissózi týraly sóz qozǵaǵaly baǵam 100 rýblden de túse bastady. Reseilik ekonomikalyq sarapshy Viacheslav Shiriaev óz elinde "dollar arzandady" degenge eshkim senbeitinin aitady.
"1 AQSh dollarynyń baǵamy – 89 rýbl. Bylai qarasańyz, tamasha ǵoi! Buǵan jurt qýanyp jatyr ma, qalai? Osyny bilmek niette men ózimniń telegramm arnamda saýalnama júrgizdim. Sodan anyqtalǵandai, maǵan jaýap bergenderdiń 60 paiyzy arzanǵa dollardy múlde satyp ala almaǵan. Al satyp alǵandarynyń qolyna ol 95-102 rýblden tiipti. Men ózim 98 rýblden satyp aldym. Nege jurt aqsha aiyrbas ornyna lap qoidy deisizder me? Óitkeni bizde, giperinfliatsiia. Ózińiz oilańyzshy, bazalyq mólsherleme 21 paiyz, infliatsiia - 9,5 paiyz. Buǵan kim senedi?.. Mundai eshbir elde, eshbir ekonomikada joq", - deidi ol.
Al infliatsiia kórsetkishiniń tómen belgilenýin, sarapshy Pýtinniń qysymy dep sanaidy.
"Onda da ekonomikamyzda bári jaqsy degendi kórsetý úshin. Onyń ústine bazalyq mólsherleme infliatsiiaǵa áser etpeitin bolyp qalǵan. Eger naryqtyq ekonomikada bolǵanda ol áser etýshi edi. Al bizdegidei barlyq aqsha soǵysqa ketip jatqanda, nesieler ákimshilik sheshim turǵysynda berilse, ol qalai nesiege, nesieleý kólemine áser ete alady? Ortalyq bank korporativtik nesie kólemin qysqarta aldyq degendi aitýda. Bul da dollar túrindegi depozitterdiń, kreditterdiń qysqarýynan júrýde. Áitpese rýbl túrindegi kreditteý berilgenniń ústine toqtaýsyz berilip jatyr", - deidi ol.
Ol Reseide dollardyń arzandaitynyna eshkim senbeitinin aitady.
"Kez kelgen aktiv qunyn joǵaltqanda ony investorlar satyp qutylýǵa tyrysady. Mysaly, qazirgi jaǵdaida dollar arzandady ǵoi. Biraq ony satyp qutylǵysy keletinderdi kórip otyrǵanymyz joq. Kerisinshe, keibir aqsha aiyrbas oryndary esigin ishinen tars jaýyp alǵan. Olardyń ózi erteń dollardyń báribir qymbattaitynyn biledi", - deidi.
Sóitken Viacheslav Shiriaev reseilikterge alda taǵy bir quldyraý bolýy múmkin ekenin eskertti:
"Mysaly Tramp "Pýtin meniń aitqanyma kónbedi, Ýkrainaǵa ásker kirgizemin, qosymsha sanktsiia salamyn" dese, Miýnhen konferentsiiasynda Vens solai dep te aitty. Al Pýtinniń kelispesi ózimizge aidan anyq. Sondyqtan alda bizdi taǵy bir quldyraý kútip tur. Onsyz da qazir ishki jaǵdai shetin deńgeige jetken. Óitkeni soǵysqa dep aqshany ońdy-soldy basyp shyǵara berdi emes pe? Endi halyq giperinfliatsiia túrinde "sonyń jemisine" keńelmek".
Buǵan deiin saitymyzda "Reseilik depýtat rýbldiń qunsyzdanýyn Orta Aziia elderinen kórdi" degen maqala jariialanǵan bolatyn.
