سوڭعى كۇندەرى بىزدەگىدەي رەسەيدە دوللار ارزانداپ جاتىر. رف ورتالىق بانكتىڭ 2025 جىلدىڭ 17 اقپانىندا بەكىتكەن 1 اقش دوللارىنىڭ قۇنى - 89 رۋبل. رەسەيلىك ساراپشىلار باعام 80 رۋبلگە دەيىن تومەندەيتىنىن بولجايدى. الايدا رەسەيلىكتەر وسى ارزان دوللاردى تاپپاي قالىپ، سەڭدەي سوعىلۋدا. ويتكەنى كەيبىر اقشا ايىرباس ورىندارى جابىق تۇر، دەپ جازادى Dalanews.kz.

ايتا كەتسەك، بىزدە 2024 جىلى قاراشا دوللار باعامى 500 دەگەن پسيحولوگيالىق شەكتى يگەرگەندە، رەسەيدە ول 120 رۋبلگە دەيىن بارعان، سودان 110 رۋبلگە ءتۇسىپ، امەريكالىق ۆاليۋتانىڭ باعامى كۇنى كەشەگە دەيىن سونىڭ اينالاسىندا تۇراقتاپ تۇرعان ەدى. ال ترامپتىڭ رەسەي مەن ۋكراينانىڭ بەيبىت كەلىسسوزى تۋرالى ءسوز قوزعاعالى باعام 100 رۋبلدەن دە تۇسە باستادى. رەسەيلىك ەكونوميكالىق ساراپشى ۆياچەسلاۆ شيريايەۆ ءوز ەلىندە "دوللار ارزاندادى" دەگەنگە ەشكىم سەنبەيتىنىن ايتادى. 

"1 اقش دوللارىنىڭ باعامى  – 89 رۋبل. بىلاي قاراساڭىز، تاماشا عوي! بۇعان جۇرت قۋانىپ جاتىر ما، قالاي؟ وسىنى بىلمەك نيەتتە مەن ءوزىمنىڭ تەلەگرامم ارنامدا ساۋالناما جۇرگىزدىم. سودان انىقتالعانداي، ماعان جاۋاپ بەرگەندەردىڭ 60 پايىزى ارزانعا دوللاردى مۇلدە ساتىپ الا الماعان. ال ساتىپ العاندارىنىڭ قولىنا ول 95-102 رۋبلدەن ءتيىپتى. مەن ءوزىم 98 رۋبلدەن ساتىپ الدىم. نەگە جۇرت اقشا ايىرباس ورنىنا لاپ قويدى دەيسىزدەر مە؟ ويتكەنى بىزدە، گيپەرينفلياسيا. ءوزىڭىز ويلاڭىزشى، بازالىق مولشەرلەمە 21 پايىز، ينفلياسيا - 9،5 پايىز. بۇعان كىم سەنەدى؟.. مۇنداي ەشبىر ەلدە، ەشبىر ەكونوميكادا جوق"، - دەيدى ول.

ال ينفلياسيا كورسەتكىشىنىڭ تومەن بەلگىلەنۋىن، ساراپشى ءپۋتيننىڭ قىسىمى دەپ سانايدى. 

"وندا دا ەكونوميكامىزدا ءبارى جاقسى دەگەندى كورسەتۋ ءۇشىن. ونىڭ ۇستىنە بازالىق مولشەرلەمە ينفلياسياعا اسەر ەتپەيتىن بولىپ قالعان. ەگەر نارىقتىق ەكونوميكادا بولعاندا ول اسەر ەتۋشى ەدى. ال بىزدەگىدەي بارلىق اقشا سوعىسقا كەتىپ جاتقاندا، نەسيەلەر اكىمشىلىك شەشىم تۇرعىسىندا بەرىلسە، ول قالاي نەسيەگە، نەسيەلەۋ كولەمىنە اسەر ەتە الادى؟ ورتالىق بانك كورپوراتيۆتىك نەسيە كولەمىن قىسقارتا الدىق دەگەندى ايتۋدا. بۇل دا دوللار تۇرىندەگى دەپوزيتتەردىڭ، كرەديتتەردىڭ قىسقارۋىنان جۇرۋدە. ايتپەسە رۋبل تۇرىندەگى كرەديتتەۋ بەرىلگەننىڭ ۇستىنە توقتاۋسىز بەرىلىپ جاتىر"، - دەيدى ول.

ول رەسەيدە دوللاردىڭ ارزاندايتىنىنا ەشكىم سەنبەيتىنىن ايتادى.

"كەز كەلگەن اكتيۆ قۇنىن جوعالتقاندا ونى ينۆەستورلار ساتىپ قۇتىلۋعا تىرىسادى. مىسالى، قازىرگى جاعدايدا دوللار ارزاندادى عوي. ءبىراق ونى ساتىپ قۇتىلعىسى كەلەتىندەردى كورىپ وتىرعانىمىز جوق. كەرىسىنشە، كەيبىر اقشا ايىرباس ورىندارى ەسىگىن ىشىنەن تارس جاۋىپ العان. ولاردىڭ ءوزى ەرتەڭ دوللاردىڭ ءبارىبىر قىمباتتايتىنىن بىلەدى"، - دەيدى.

سويتكەن ۆياچەسلاۆ شيريايەۆ رەسەيلىكتەرگە الدا تاعى ءبىر قۇلدىراۋ بولۋى مۇمكىن ەكەنىن ەسكەرتتى:

"مىسالى ترامپ "پۋتين مەنىڭ ايتقانىما كونبەدى، ۋكرايناعا اسكەر كىرگىزەمىن، قوسىمشا سانكسيا سالامىن" دەسە،  ميۋنحەن كونفەرەنسياسىندا ۆەنس سولاي دەپ تە ايتتى. ال ءپۋتيننىڭ كەلىسپەسى وزىمىزگە ايدان انىق. سوندىقتان الدا ءبىزدى تاعى ءبىر قۇلدىراۋ كۇتىپ تۇر. ونسىز دا ءقازىر ىشكى جاعداي شەتىن دەڭگەيگە جەتكەن. ويتكەنى سوعىسقا دەپ اقشانى وڭدى-سولدى باسىپ شىعارا بەردى ەمەس پە؟ ەندى حالىق گيپەرينفلياسيا تۇرىندە "سونىڭ جەمىسىنە" كەڭەلمەك".  

بۇعان دەيىن سايتىمىزدا "رەسەيلىك دەپۋتات ءرۋبلدىڭ قۇنسىزدانۋىن ورتا ازيا ەلدەرىنەن كوردى" دەگەن ماقالا جاريالانعان بولاتىن.