Qazaqstan Parlamenti Senaty pedagogtardyń quqyqtary men mindetterine qatysty zańnamalyq túzetýlerdi eki oqylymda qarap, maquldady. Jańa qujat muǵalimderdiń jaýapkershilik aiasyn naqtylap, olardy jumys ýaqytynan tys bolǵan oqiǵalar úshin negizsiz jaýapqa tartýdan qorǵaýǵa baǵyttalǵan, dep habarlaidy dalanews.kz.
Zań jobasyndaǵy basty ózgeristerdiń biri – pedagogtar men bilim berý uiymy basshylarynyń oqýshylarǵa qatysty quqyqtyq jaýapkershiligin naqty belgileý. Endi muǵalimder men mektep ákimshiligi bilim alýshylar nemese tárbielenýshilermen bolǵan jaǵdailar úshin tek kásibi mindetin oryndap júrgen ýaqytta ǵana jaýapty bolady.
Iaǵni pedagogtyń jaýapkershiligi resmi jumys ýaqytymen, sabaq barysymen jáne bilim berý protsesimen shekteledi. Bul ózgeris mektepten tys jerde nemese sabaqtan keiin bolǵan oqiǵalarǵa bailanysty muǵalimderdi orynsyz kinálaýdyń aldyn alýǵa múmkindik beredi.
Sonymen qatar, jańa zańda mektepterde uialy telefondardy paidalaný tártibine qatysty da norma qarastyrylǵan. Oqý-aǵartý ministrligine orta bilim berý uiymdarynda oqýshylardyń smartfon qoldaný qaǵidalaryn ázirlep, bekitý quzyreti beriledi.
Bul talap oqý protsesin júieleýge, sabaq kezinde oqýshylardyń gadjetke alańdaýyn azaitýǵa jáne mektep ishindegi tártipti zań júzinde retteýge baǵyttalǵan.
Senatorlar qoldaǵan zań jobasy endi Prezident Qasym-Jomart Toqaevtyń qol qoiýyna jiberildi. Qujatqa Memleket basshysy qol qoiyp, resmi túrde jariialanǵannan keiin zań kúshine enedi.
Jańa túzetýler bilim berý salasynda pedagogtardyń quqyqtyq qorǵalýyn kúsheitip, muǵalimderdiń naqty mindeti men jaýapkershilik shegin aiqyndaýǵa múmkindik beredi.
