Qazaqstanda ishki saýda barǵan saiyn tsifrlyq formatqa aýysyp keledi. El turǵyndary marketpleister men onlain servister arqyly taýar satyp alyp, qyzmetke jii júginetin bolǵan. Ulttyq statistika biýrosynyń derekteri boiynsha, 2025 jyly Qazaqstandaǵy elektrondy bólshek saýda kólemi 3,77 trln teńgege jetken, dep habarlaidy dalanews.kz.
"QZ Economy.Taldaý" telegram arnasynyń málimetinshe, onlain saýdanyń negizgi úlesi marketpleisterge tiesili. Jalpy kólemniń 86 paiyzy dál osy platformalar arqyly júzege asqan. Qalǵan bóligi óndirýshiler men qyzmet kórsetýshilerdiń jeke saittaryna tiesili.
Salystyrmaly túrde alǵanda, 2022 jyly elektrondy saýda kólemi 2 trln teńgege de jetpegen edi. Osylaisha, sońǵy birneshe jylda internet arqyly saýda jasaý aitarlyqtai ósken.
Internet saýdasynyń jalpy bólshek saýdadaǵy úlesi de ulǵaiyp keledi. Eger 2022 jyly bul kórsetkish 12,5 paiyz bolsa, 2025 jyly 14,3 paiyzǵa jetken.
Statistikaǵa súiensek, qazaqstandyqtar marketpleister arqyly kóbine telefon men túrli gadjet satyp alady. Bul sanat jalpy onlain saýdanyń 17,1 paiyzyn quraǵan. Sondai-aq kiim, aiaqkiim jáne sport taýarlary – 12,4 paiyz, úi men saiajaiǵa arnalǵan taýarlar – 12,1 paiyz, turmystyq tehnika – 10,3 paiyz, al azyq-túlik 7,4 paiyz úleske ie bolǵan.
Aqshalai eseptegende, turǵyndar bir jyl ishinde telefondar men gadjetterge shamamen 553 mlrd teńge jumsaǵan. Al kiim-keshek pen úige arnalǵan taýarlarǵa 400 mlrd teńgeden astam qarjy ketken.
Sarapshylardyń aitýynsha, bul kórsetkishter qazaqstandyqtardyń internet arqyly saýda jasaýǵa beiimdelip, onlain satyp alýǵa degen senimi artqanyn kórsetedi.
Onlain qyzmet kórsetý salasynda da ósim baiqalady. 2022 jyly elektrondy kommertsiia arqyly kórsetilgen qyzmet kólemi 1,18 trln teńge bolsa, 2025 jyly bul kórsetkish 2,5 trln teńgege jýyqtaǵan.
Bul baǵytta eń úlken úles jolaýshylar tasymaly qyzmetterine, iaǵni taksi servisterine tiesili bolǵan – 42,6 paiyz. Al áýe biletteri men ózge de kólik brondaý qyzmetteri 30,8 paiyz úles alǵan.
Mamandardyń pikirinshe, mundai ózgerister tsifrlandyrýdyń qazaqstandyqtardyń kúndelikti ómiriniń ajyramas bóligine ainalǵanyn ańǵartady. Onlain saýda men servister ýaqyt únemdeýge múmkindik berip qana qoimai, otandyq óndirýshiler men qyzmet kórsetýshilerdiń tutynýshylarǵa qoljetimdiligin arttyryp otyr.
