TMD músheleriniń týristik áleýetin nyǵaitý boiynsha jańa tetikter engizilýi múmkin. Bul másele Ystyqkólde ótken TMD Memlekettik aqparat agenttikteri basshylary keńesiniń XXXV otyrysynda keńinen talqylandy, dep habarlaidy dalanews.kz.
Jiynda Kazinform agenttiginiń basqarýshy direktory Naǵashybek Aldan aqparat agenttikteri arasynda týristik kontent almasýdy júieli túrde jolǵa qoiýdy usyndy. Sonyń ishinde osy baǵytqa jaýapty úilestirýshilerdi belgileý qajettigin atap ótti.
— Árqaisymyzdyń aqparattyq resýrstarymyzdyń múmkindigi zor jáne óz elderimizdegi jetekshi mediaresýrstardyń biri bolyp sanalady. Biyl Qazaqstan boiynsha aýqymdy jumys júrgizdik. Atap aitqanda, tilshilerimiz týristik óńirlerge baryp, qyzmetterdiń quny, infraqurylym jáne demalys jaǵdailary t. b. taqyryptarda jan-jaqty materialdar ázirledi. Biz bul kontentti áriptesterimizben bólisýge daiynbyz. Týrizm taqyrybyna jaýapty jeke úilestirýshini belgileý mundai jumystardy júieli ári tiimdi etýge múmkindik beredi, — dedi Naǵashybek Aldan.
Al TASS bas direktory Andrei Kondrashov ulttyq aqparat agenttikteriniń atalǵan baǵyttaǵy ózara is-qimylyn jandandyrý ideiasyn qoldady. Onyń aitýynsha, TMD elderiniń týristik áleýeti zor bolǵanymen, kei máseleler boiynsha kórshiles memleketterdiń turǵyndaryna áli de jetkilikti deńgeide aqparat berilip jatqan joq.
— Búginde biz bir-birimiz úshin buǵan deiin ózimiz de bilmegen orasan zor týristik múmkindikterdi ashyp jatyrmyz. Árqaisymyzdyń elimizdegi týristik oryndarǵa kórshiles halyqtardyń qyzyǵýshylyǵy artyp keledi. Ondai jerlerdiń qataryna tarihi nysandar da, zamanaýi týristik klasterler de kiredi. Bul saladaǵy jumysty odan ári kúsheitip, elderimizdegi týristik oryndar jaiynda barynsha keń aýqymda aqparat berýimiz kerek, — dedi Andrei Kondrashov.
Qyrǵyz ulttyq «Kabar» aqparat agenttiginiń direktory Mederbek Shermetaliev te bul taqyryptaǵy ustanymyn málimdedi. Onyń sózinshe, Qyrǵyzstan VI Dúniejúzilik kóshpendiler oiyndaryna daiyndalyp jatyr. Shermetaliev TMD elderiniń aqparat agenttikterin aldaǵy halyqaralyq is-sharany kórsetýde aqparattyq qoldaý bildirýge shaqyrdy.
— Dúniejúzilik kóshpendiler oiyndary — halyqaralyq mańyzy bar aýqymdy shara. Biz úshin onyń Qyrǵyzstannan tys jerlerde keńinen nasihattalýy óte ózekti másele. TMD elderiniń aqparat agenttikteri atalǵan doda týraly jańalyqtardy, reportajdardy jáne basqa da materialdardy turaqty túrde jariialap otyrsa, biz buǵan óte riza bolar edik, — dedi Mederbek Shermetaliev.
Jiynǵa qatysýshylar týristik kontentti júieli túrde almasyp otyrýdyń tiimdiligine toqtaldy. Ondai áriptestik TMD elderiniń turǵyndaryn jańa týristik baǵyttar men nysandar týraly keńinen habardar etýge múmkindik beredi. Sonyń arqasynda týristik aǵyn da artady.
