Qazaqstandaǵy táýelsiz aqparat quraldarynyń biri – Orda.kz redaktsiiasy 2026 jylǵy 1 qyrkúiekten bastap jumysyn tolyq toqtatatynyn málimdedi. Bul týraly bas redaktor Anna Platonova arnaiy málimdeme jasady, dep habarlaidy dalanews.kz.
Redaktsiianyń habarlaýynsha, jabylý negizgi aqparattyq portalǵa ǵana emes, sonymen qatar áleýmettik jelilerdegi barlyq resmi paraqshalar men YouTube arnasyna da qatysty bolady. Málimdemede redaktsiia qyzmetin toqtatý týraly sheshimdi «Ordamedia.kz» JShS-niń quryltaishysy ári alǵashqy basshysy Maqsat Ǵaniev qabyldaǵany aitylǵan. Anna Platonovanyń sózinshe, bul sheshimniń astarynda qandai da bir saiasi nemese ózge sebepter joq.
– Qyzmetimizdi toqtatý týraly sheshimniń eshqandai jasyryn sebebi joq. Redaktsiianyń tabysy onyń jumysyn tolyq qamtamasyz etýge jetpeidi. Qazirgi jaǵdaiǵa alyp kelgen basqa sebepter joq, – delingen habarlamada.
Sondai-aq redaktsiia ózine alǵan barlyq mindettemelerdi tolyq oryndaýǵa kúsh salatynyn atap ótti. Orda.kz ujymy qazaqstandyq jáne sheteldik buqaralyq aqparat quraldaryn redaktsiia atynan taralatyn tek resmi málimdemelerge ǵana súienýge shaqyrdy. Málimdeme sońynda bas redaktor Anna Platonova oqyrmandarǵa qoldaý kórsetkeni úshin alǵys bildirdi.
Orda.kz sońǵy jyldary Qazaqstandaǵy qoǵamdyq-saiasi taqyryptardy turaqty jariialap kelgen táýelsiz aqparattyq platformalardyń biri retinde tanylǵan.
