قازاقستانداعى تەۋەلسٸز اقپارات قۇرالدارىنىڭ بٸرٸ – Orda.kz رەداكتسيياسى 2026 جىلعى 1 قىركٷيەكتەن باستاپ جۇمىسىن تولىق توقتاتاتىنىن مەلٸمدەدٸ. بۇل تۋرالى باس رەداكتور اننا پلاتونوۆا ارنايى مەلٸمدەمە جاسادى, دەپ حابارلايدى dalanews.kz.
رەداكتسييانىڭ حابارلاۋىنشا, جابىلۋ نەگٸزگٸ اقپاراتتىق پورتالعا عانا ەمەس, سونىمەن قاتار ەلەۋمەتتٸك جەلٸلەردەگٸ بارلىق رەسمي پاراقشالار مەن YouTube ارناسىنا دا قاتىستى بولادى. مەلٸمدەمەدە رەداكتسييا قىزمەتٸن توقتاتۋ تۋرالى شەشٸمدٸ «Ordamedia.kz» جشس-نٸڭ قۇرىلتايشىسى ەرٸ العاشقى باسشىسى ماقسات عانيەۆ قابىلداعانى ايتىلعان. اننا پلاتونوۆانىڭ سٶزٸنشە, بۇل شەشٸمنٸڭ استارىندا قانداي دا بٸر ساياسي نەمەسە ٶزگە سەبەپتەر جوق.
– قىزمەتٸمٸزدٸ توقتاتۋ تۋرالى شەشٸمنٸڭ ەشقانداي جاسىرىن سەبەبٸ جوق. رەداكتسييانىڭ تابىسى ونىڭ جۇمىسىن تولىق قامتاماسىز ەتۋگە جەتپەيدٸ. قازٸرگٸ جاعدايعا الىپ كەلگەن باسقا سەبەپتەر جوق, – دەلٸنگەن حابارلامادا.
سونداي-اق رەداكتسييا ٶزٸنە العان بارلىق مٸندەتتەمەلەردٸ تولىق ورىنداۋعا كٷش سالاتىنىن اتاپ ٶتتٸ. Orda.kz ۇجىمى قازاقستاندىق جەنە شەتەلدٸك بۇقارالىق اقپارات قۇرالدارىن رەداكتسييا اتىنان تارالاتىن تەك رەسمي مەلٸمدەمەلەرگە عانا سٷيەنۋگە شاقىردى. مەلٸمدەمە سوڭىندا باس رەداكتور اننا پلاتونوۆا وقىرماندارعا قولداۋ كٶرسەتكەنٸ ٷشٸن العىس بٸلدٸردٸ.
Orda.kz سوڭعى جىلدارى قازاقستانداعى قوعامدىق-ساياسي تاقىرىپتاردى تۇراقتى جارييالاپ كەلگەن تەۋەلسٸز اقپاراتتىق پلاتفورمالاردىڭ بٸرٸ رەتٸندە تانىلعان.
