Oblys ortalyǵynda Óskemen-1 stantsiiasynyń temirjol vokzalyn rekonstrýktsiialaý jumystary aiaqtaldy, dep habarlaidy dalanews.kz.
Jańartylǵan vokzaldyń ashylý saltanatyna «Samuryq-Qazyna» AQ Basqarma tóraǵasy Nurlan Jaqypov, Shyǵys Qazaqstan oblysynyń ákimi Nurymbet Saqtaǵanov jáne «Qazaqstan temir joly» UK» AQ basshylyǵy qatysty.
Óskemen-1 stantsiiasynyń vokzaly 1938 jyly salynǵan. Júrgizilgen tekserý qorytyndysy boiynsha eski ǵimarat tolyqtai buzylyp, onyń ornyna zamanaýi jańa nysan boi kóterdi. Vokzaldyń jalpy aýmaǵy eki eseden astam ulǵaiyp, 858 sharshy metrden 1,8 myń sharshy metrge jetti.
Jańa vokzal qaýipsizdikke, jolaýshylar aǵynyn uiymdastyrýǵa jáne jolaýshylarǵa qolaily jaǵdai jasaýǵa qoiylatyn zamanaýi talaptar eskerile otyryp jobalanǵan. Injenerlik kommýnikatsiialar jańartylyp, perron rekonstrýktsiialandy, vokzal aýmaǵy abattandyryldy.
«Vokzaldyń qaýipsizdigi men qoljetimdiligine erekshe kóńil bólindi. Qozǵalysy shekteýli jolaýshylar úshin liftiler, eskalator, kótergish platformalar jáne taktildi navigatsiia qarastyrylǵan. Vokzal zamanaýi beinebaqylaý jáne órt qaýipsizdigi júielerimen jabdyqtalǵan», – dedi «Samuryq-Qazyna» AQ Basqarma tóraǵasy Nurlan Jaqypov.
Vokzal kún saiyn 2 myńnan astam jolaýshyǵa qyzmet kórsetedi. Stantsiia arqyly Óskemendi Astana, Almaty, Aiagóz, Jezqazǵan, Qaraǵandy jáne Dostyqpen bailanystyratyn 12 jolaýshylar poiyzy qatynaidy.
Óskemen-1 vokzalyn rekonstrýktsiialaý Memleket basshysy Qasym-Jomart Toqaevtyń tapsyrmasy boiynsha elimizde júzege asyrylyp jatqan temirjol vokzaldary men olardyń infraqurylymyn jańǵyrtý jónindegi aýqymdy baǵdarlama aiasynda júrgizildi. Biyl el boiynsha 124 vokzaldyń 121-in jańǵyrtý josparlanǵan.
Shyǵys Qazaqstan oblysynda atalǵan baǵdarlama aiasynda bes temirjol vokzalyn rekonstrýktsiialaý kózdelgen. Onyń tórteýi - Shemonaiha, Ridder, Altai qalalaryndaǵy jáne Kúmistaý stantsiiasyndaǵy nysandar paidalanýǵa berildi. Jańartylǵan Óskemen-1 vokzalynyń iske qosylýy óńirdegi osy jumys kezeńin tolyq aiaqtaidy.
«Jańa temirjol vokzaly Shyǵys Qazaqstannyń áleýmettik-ekonomikalyq damýynda mańyzdy ról atqarady. Ol kólik qoljetimdiligin qamtamasyz etip, oblysty elimizdiń basqa óńirlerimen bailanystyrady. Vokzaldy jańǵyrtý jolaýshylarǵa neǵurlym qolaily jaǵdai jasaýǵa, qyzmet kórsetý sapasyn arttyrýǵa jáne infraqurylymdy ósip kele jatqan jolaýshylar aǵynyna beiimdeýge múmkindik beredi. Bir baǵdarlama aiasynda bes vokzaldy jańǵyrttyq. Búgin jańartylǵan Óskemen-1 vokzalynyń ashylýymen osy jumys kezeńin aiaqtap otyrmyz. Bul – oblys ortalyǵyndaǵy negizgi temirjol vokzaly. Munda kún saiyn myńdaǵan jolaýshy qatynaidy. Sondyqtan olardyń zamanaýi ári jaily qyzmet túrlerin paidalanýy mańyzdy», – dedi Shyǵys Qazaqstan oblysynyń ákimi Nurymbet Saqtaǵanov.
Aita keteiik, joba «Qazaqstan temir joly» UK» AQ tarapynan Qazaqstan Respýblikasy Úkimetiniń, «Samuryq-Qazyna» AQ-nyń, Kólik ministrliginiń jáne Shyǵys Qazaqstan oblysy ákimdiginiń qoldaýymen júzege asyryldy.
