Sankt-Peterbýrg soty 23 jastaǵy Qazaqstan azamaty Garri Azariandy eki aiǵa, iaǵni 14 shildege deiin qamaýǵa alý týraly sheshim shyǵardy. Reseilik BAQ-tyń habarlaýynsha, oǵan terrorizmdi jariia túrde aqtady jáne nasihattady degen aiyp taǵylyp otyr, dep habarlaidy Dalanews.kz.
Atalǵan is reseilik Telegram-arnalarynda “trotskishiler isi” dep atala bastady — sebebi bul tergeý aiasynda Azariannan bólek taǵy alty stýdent tutqyndalǵan.
Garri sotta óz kinásin moiyndamai, barlyǵyn ashyq aityp túsindirýge daiyn ekenin málimdedi:
"Men kináli ekenimdi moiyndamaimyn. Kerisinshe, kinásiz ekenimdi dáleldeýge daiynmyn. Tergeýden qashý nemese kedergi keltirý oiymda joq. Qoǵamǵa tikelei qaýip tóndirip turǵan joqpyn dep oilaimyn. Turyp jatqan jerim — jataqhana — beinebaqylaýmen qamtylǵan, arnaiy ótkizý júiesi de bar. Iaǵni meniń júris-turysymdy baqylaý ońai", — degen onyń sózin «Býmaga» arnasy keltiredi.
"Rotonda" telegram arnasynyń jazýynsha, Garri — Qazaqstan azamaty, Sankt-Peterbýrg memlekettik ýniversitetiniń magistratýrasynda saiasattaný mamandyǵy boiynsha bilim alady. Ol Petergoftaǵy jataqhanada turyp, bos ýaqytynda “Ihi-Ohi” atty bi klýbyn júrgizedi. Klýb ataýy shotland tilinen "Munda da emes, onda da emes" dep aýdarylady.
